تنێبوون
سالح دۆسكی
خۆدیكا دویركەفتنێ
د ناڤبەرا من و سیبەرێن ل سەر ئاسۆیان
ب دیالۆگەکا بێدەنگە..
ل دۆر «پسیارێ» دزڤڕم
وەك دزیكەرەكی خۆ ل بەر خۆ ڤەدای
و تنێبوونا من… وەک دایکەکا دلۆڤان
من دنازینیت…
تنێبوون بێ جەستەیە،
بێ دیوارە
سەمایەكا سەردەمە!
دەمێ ئەز خۆ تێدا دبینم
پەنجەرە دبنە چاڤ
و دەرگەهـ دبنە دەستێن درێژ…
ل وێرێ… د کویراتیا چۆلستانا ناخێ خۆدا
ئەز پرت وبەلاڤ نابم
بەلکو ب دەنگ و ناڤم
خۆ یێ ڕاستەقینە کۆم دکەم…
ئەو ڤەدەربوونا دبێژنێ «ڕەڤین»
سەفەرەكا ڕەهایە
كڤاشتنا جهایە…!
ئەز ژ جیهانێ نەڕەڤیمە
ئەز یێ ژ وندابوونێ دەرکەفتیم
دا جیهانێ ب دروستی
دخۆدا ئاڤا بكەم…
ئەز گەردوونێ مەزنم…
چنكی بتنێمە و هەمی دگەل منن
دڤێت ئەز ل سەر کەنارێ هەییێ راوەستم
دا کو هەبوونێ
د هندەک ئاشۆبێ سپی دا
بكەم واتا…
د ڤێ تنێبوونا کویر و دویر دا
ئەو كەسێن من ژ دەست دابوون،
ل پێش چاڤێن من حازرن…!
ل سەر دەمارێن دلێ من دهێن و دچن..
هەبوونا وان ڕاستەقینەترە
چونکی ئەو ناهێن پیڤان..
و ئەز ب ڤێ تنێبوونێ ژدەرڤەی زەمنی
ژیانێ ب ڕێ دئێخم…
د ڤەدەربوونا خۆدا،
ئەز بوومە دلێ هەمی پەیڤان..
ل داوییێ
تنێبوونێ ئەز فێرکرم…
ئەز وەك هەمیا
بوونەوەركێ جهێ دلپێڤەمانێ!
