٢٥ هزار تەنێن پیڤازان ل دەشتا ناڤكوڕێ د بن گەفێن ژناڤچوونێ دانە
رەمەزان زەكەریا
دەشتا ناڤكوڕێ ئێكە ژ دەڤەرێن هەرە باش و ناڤدار بۆ چاندنا پیڤازان ل سەر ئاستێ هەرێما كوردستانێ و ئیراقێ، ئەڤ سالە دگەل پێگەهشتنا بەرهەمی تووشی قەیرانەكا مەزن یا ساخكرنێ بوویە، ژبەر ڕێگریێن بازگەهێن حكومەتا ئیراقێ، ئەڤ چەندە ژی مەترسیەكا رژدە ل سەر ژناڤچوونا بەرهەمێ ئێك سال یێ پیڤازان دروست كریە.
مام شەهاب جوتیارەكێ دەڤەرێیە بۆ ئەڤرۆ گۆت: ئەڤ سالە بەرهەمێ مە گەلەك باش و زۆر بوو، مە حەز دكر ئەڤ بەرهەمە بچیتە پارێزگەهێن دی یێن ئیراقێ دا كو جوتیار مفادار بیت، بەلێ مخابن ڕێگری لێ دهێتە كرن.
ناڤبری گۆتژی: ئەڤ سالە ل دەشتا ناڤكورێ كو دكەڤیتە سەر سنوورێ هەر سێ دەڤەرداریێن ئاكرێ، بەردەرەش و شێخان پتر ژ ٦ هزار دۆنەمێن ئەردی ب بەرهەمێ پیڤازێ هاتبوونە چاندن، ل دووڤ پێشبینیێن لایەنێن پەیوەندیدار چاڤەرێ دهێتە كرن بەرهەم بگەهیتە زێدەتری ٢٥ هزار تەنان ئەڤە ژی ڕێژەیەكا گەلەك مەزنە و دشێت پێدڤییا بازارێن ناڤخۆیی و پارێزگەهێن دی یێن ئیراقێ دابینبكەت.
خۆیاكر: د نوكەدا ژبەر نەبوونا بازاڕی و ڕێگریێن بازگەیێن ئیراقێ بۆ ڤەگۆهاستنا بەرهەمی بەرەڤ پارێزگەهێن ناڤەراست و باشوور پتر ژ نیڤا ڤی بەرهەمی هێشتا د ناڤ زەڤیان دا مایە و نەهاتیە كۆمكرن.
عەباس عەلی جوتیارەكێ دی یێ دەڤەرێیە بۆ ئەڤرۆ گۆت: ئەم داخواز دكەین حكومەت هاریكاریا مە بكەت دا كو بەرهەمێ مە بگەهیتە هەمی پارێزگەها و ڕێگری لێ نەهێتە كرن، جهێ دەستخۆشیێیە كو حكومەتا هەرێمێ سنوور گرتینە و ناهێلیت پیڤازا ئێرانی و توركی بهێتە ناڤخۆ، بەلێ پێدڤییە رێكا بەغدا ژی ل هەمبەر مە بهێتە ڤەكرن.
گۆتژی: دەمێ كۆمكرنا بەرهەمی هاتیە، بەلێ دەرئەنجامێ بێ بازاڕیێ جوتیارێن دەشتا ناڤكورێ چاڤەڕێی چارەیەكا بلەز ژ لایەنێن پەیوەندیدارن دكەین كو دەرگەهێن بازرگانی دگەل پارێزگەهێن ئیراقی بهێنە ڤەكرن بەری كو 25 هزار تەنێن پیڤازێ ژبەر گەرم و تیشكا رۆژێ خراب ببن و ببنە ئەگەرێزیان گەهاندنێ ب سەدان خێزانێن جوتیاران.
ئەندازیار سەعید مزگین ئەندازیارێ چاندنێ ل دەڤەرێ بۆ ئەڤرۆ گۆت: پێدڤییە پیڤاز ب تەمامی بهێتە ڕاكرن ئەگەر رۆژەك یان دوو رۆژان ل ناڤ زەڤی بمینیت دا كەسكاتیا وێ نەمینیت چ ئاریشە نینە، بەلێ دڤێت د زووترین وەخت دا بهێتە ڕەوانەكرن بۆ بازاران پیڤاز بەرهەمەكێ ناسكە ئەگەر زۆر ژبەر هەتاڤێ و گەرمێ بمینیت ئەگەرەكێ مەزنە هەیە تێكبچیت و جوتیاران زیانەكا مەزن پێ بگەهیت.
