ئیرانێ شیایە گەلەک کارتێن بهێز ل دژی ئەمریکا بکار بینیت
چاڤدێرێن سیاسی دیار دکەن، ئێرشێن ڤێ دووماهیێ یێن حوسیێن یەمەنێ ل سەر عەرەبستانا سعوودیێ نیشا ددەت کو ئیرانێ شیایە هەم کارتا حوسییان و هەم ژی کارتا دەرتەنگا هورمزێ گەلەک باش بکار بینیت و ئاستەنگان ل هەمبەر ستراتیژیا ئەمریکا دروست بکەت، چونکی حوسییان شیاینە زیانێن گەلەک مەزن بگەهیننە عەرەبستانێ و هەروەسا هەکە حوسی ب فەرمانا ئیرانێ رێیا دەریایی یا بابولمەندەب ژی بگرن وی دەمی دێ ئالۆزیێن گەلەک مەزن ل دەڤەرێ روو دەن و ئەو یەک ژی دێ بیتە ئەگەر ئەمریکا پێداچوونێ د ستراتیژیا خوە یا شەڕی دا بکەت.
ل گۆر باوەریا چاڤدێرێن سیاسی ئێک ژ ئاریشەیێن سەرەکی یێن ئەمریکا ئەوە هەتا نها ئەمریکا نەشیایە بەرەیەکێ بهێز ل دژی ئیرانێ و گرۆپێن چەکدار دروست بکەت، هەتا نها ژی بەرنامەیێ ئەمریکا بۆ پاشەرۆژا ئیرانێ ئاشکرا نینە، ئسرائیل وەکو هەڤپەیمانا سەرەکی یا ئەمریکا ژ ستراتیژیا ترامپی رازی نینە و هەتا ئسرائیل و وەلاتێن ناتۆ پشکداریێ د شەڕی دا نەکەن ئیران خوە رادەست ناکەت و دێ هەردەم شێت کارتێن هەی ب رەنگەکێ باش ل دژی ئەمریکا بکار ئینیت و دێ ئاستەنگان ل هەمبەر بەرنامەیێ ئەمریکا ل دەڤەرێ دروست کەت.
ئەو یەک د دەمەکێ دایە کو بەری نها چەندین بەرپرسێن ئەمریکا ژی دیار کربوون دانوستاندن ل گەل ئیرانێ چو مفایێن خوە نابیت و دڤێت ئەمریکا ل گەل هەڤپەیمانێن خوە دەست ب شەڕەکێ مەزن ل دژی ئیرانێ بکەت، چونکی مانا رژێما نها یا ئیرانێ دێ بیتە مەترسیەکا گەلەک مەزن بۆ بەرژەوەندیێن ئەمریکا ل رۆژهەلاتا ناڤین.
