رۆژنامەیا شەرقولئەوسەت: پشكەك ژ داهاتێ پەترۆلا ئیراقێ بۆ حەماس و حۆسییان دهێتە تەرخانكرن
رۆژنامەیا شەرقولئەوسەت د راپۆرتەكا خۆ دا ل رۆژا شەمبی 25/7/2026 گەندەلییەكا مەزن یا حزبێن شیعی و میلیشیایان ل ئیراقێ ئاشكرا دكەت، كو داهاتێ ژ فرۆتنا پەترۆلێ ب دەست دكەڤیت، راستەوخۆ ناچیتە دەستێ ئیرانێ، بەلكو بۆ حەماس و حووسییان دهێتە هنارتن.
راپۆرتەكا رۆژنامەیا «شەرقولئەوسەت» ئاشكرا دكەت كو «نڤیسینگەهێن ئابۆری» ل ئیراقێ، كو دەزگەهێن دارایی یێن سەر ب حزب و میلیشیایان ڤە نە، ب رێیا دروستكرنا لەشكەرەكێ مەزن ژ قونتەرچی و كۆمپانییێن ساختە، دەست ب سەر بودجە و داهاتێن پەترۆلێ دا گرتییە.
ئەڤ نڤیسینگەهە ل دوو دەهـ سالێن بۆری دا ب رەنگەكێ وەسا كار دكەن كو نەك بتنێ بازاڕێ ناڤخۆ كونترۆل كرییە، بەلكو شیانێن مەزن یێن وێ چەندێ هەنە كو ئاراستەیێ هەلبژارتنان ژی بگوهۆڕن.
ل دووڤ راپۆرتا وێ رۆژنامەیێ، ئیرانێ رۆلەكێ سەرەكی د ڤێ پرۆسەیێ دا هەیە، چونكی ب رێیا وان نڤیسینگەهان پشكەك ژ پەترۆلا رەش دهێتە دزین و داهاتێ وێ بۆ پشتەڤانیكرنا بەربژارێن حزبێن ئیراقی و دیسان بۆ پارەداركرنا حەماس و حۆسییان بكار دئینیت.
شایەدییا بەرپرس و ڤەكۆلەرو پەرلەمانتاران دیار دكەت كو ئەڤ نڤیسینگەهە سیستەمەكێ خۆكار دروست كریە كو هەردەم نڤیسینگەهێن ل ژێر یێن نوو ژێ پەیدا دبن، و هێزا خۆ ژ گرۆپێن چەكدار وەردگرن. شارەزایەكێ ئیراقی دیار كر كو نێزیكیی 40 تۆڕێن گەندەلیێ هەنە و نێزیكی 200 شانەیێن هەژموونێ ل ناڤ وەزارەت، جڤاتێن پارێزگەهان، باژێرڤانی و بانكان دا هەنە، و وان نێزیكی هزار كۆمپانییێن ساختە دروستكرینە.
سەبارەت ب دەستەسەركرنا هندەك بەرپرسان ژ بەر گەندەلیێ، راپۆرتا رۆژنامەیێ ئاشكرا كر كو «عەدنان ئەلجومەیلی»، بریكارێ وەزارەتا پەترۆلێ یێ كو نۆكە دبن ڤەكۆلینێ دا یە، ئێك ژ پێنج كەسایەتیێن سەرەكی یە كو چالاكیێن قاچاخچییا پەترۆلێ ل پارزینگەهێن باكوورێ ئیراقێ رێڤە دبەت.
