رۆژنامەیا مەدا: ئەرێ زەیدی دێ شێت ئیرادەیا گرۆپان شكێنیت؟
رۆژنامەیا (مەدا) یا ئیراقی د نووترین راپۆرتا خۆدا بەلاڤكر كو رەوشا سیاسی یا ئیراقێ پشتی رێوڕەسمێن ڤەشارتنا مەرجەعێ ئیرانی د ناڤبەرا بەرپرسێن ئیراقێ دا بۆیە ئاستەنگەكا مەزن و گەلەك ئالێ ڤێ رەوشێ وەك خالەكا وەرچەرخانێ دبینن كو دێ كارتێكرنێ ل سەر پەیوەندیێن بەغدا و واشنتۆنێ كەت د دیدارێن پشت پەردەیێ دا هاتییە دیاركرن كو هەبوونا بەرپرسێن بلند یێن ئیرانێ ل ئیراقێ پەیامەكا نەخۆشە بۆ ئیدارەیا ترەمپی و دبیت ببیتە ئەگەرێ ئاستەنگكرنا «رێككەفتنا خزیرانێ» یا كو سەرۆك وەزیرێن ئیراقێ عەلی زەیدی دخوازیت ل واشنتۆنێ ئیمزا بكەت.
عەلی زەیدی، سەرۆك وەزیرێن ئیراقێ د بزاڤەكێ دا بۆ پاقژكرنا ناڤێ حوكمەتێ ژ هەموو وان كەسێن كو د شەڕێ دژی ئیرانێ دا پشكدار بووینە یان پەیوەندیێن وان ل گەل گرۆپێن چەكدار هەنە بریار دایە كو چو كەس ژ وان پوستێن كارگێڕی و حكومی یێن بلند ناوەرگریت ژ وان ژی سەركردەیێن گرۆپان كو د هەلبژارتنان دا كورسیێن جڤاتا نوونەران ژی ب دەست ڤە ئیناینە و ب نهێنی حوكمەتێ دەست ب هەوەكاژ كاردەركرنێ یا بەرفرەهـ كریە دژی وان كەسێن كو د ئۆرگانێن فەرمی یێن دەولەتێ دا كار دكەن و د هەمان دەم دا سەر ب گرۆپان ڤە نە.
ژ ئالییەكێ دی كێشەیا هەرە مەزن یا كو حوكمەتا زەیدی پێڤە مژوولە پرسا چەكێ گرانە كو گرۆپێن چەكدار رەت دكەن رادەست بكەن. د نووترین پێشهاتان دا دیار بوویە كو وان گرۆپان تنێ هندەك چەكێ «بێ مفا» رادەستی حوكمەتێ كرینە لێ هەشت مووشەكێن بالیستی یێن مەترسیدار و سەدان فڕۆكەیێن بێ فڕۆكەڤان هێشتا د دەستێ وان دا ماینە و وان ئاشكرا كریە كو ئەو چەك ب رێیا ئیرانێ گەهشتینە دەستێ وان و هەكە ئیران نەبێژیت وان رادەست بكەن ئەو چو جاران بەرهەڤ نینن رادەست بكەن.
ل دۆر پێكئیینانا حوكمەتێ ژی ئاستەنگێن مەزن یێن ئەمریكی دەركەفتینە دژی پشكداریكرنا «عەسائیب ئەهلولحەق» د حوكمەتێ دا ب تایبەت ژی دژی وەرگرتنا پوستێ جێگرێ سەرۆك وەزیری نە ژ ژئالیێ (قەیس خەزعەلی) ڤە و د هەمان دەم دا ناكۆكیێن ناڤخۆیی یێن هەڤپەیمانیێن سیاسی وەك (دەولەتا یاسایێ) ب سەرۆكاتییا مالكی و (گەشەپێدان و ئاڤاكرن) ب سەرۆكاتییا سوودانی ل سەر پشكێن وەزاری بەردەوامن و هەموو ئاماژە دیار دكەن كو حوكمەتا ئیراقێ ل پێشبەری ئالۆزییەكا درێژخایەن یا سیاسی و ئەمنی دایە.
