خودان هاڤینگەهێن زاخۆ دخوازن هاتنوچوونا گەشتیاران بهێتە ڕێكخستن
زاخۆ، دلۆڤان هالۆ:
خودان هاڤینگەهێن گەشتیاری یێن ئیدارەیا سەربخوە یا زاخۆ، دخوازن هاتنوچوونا گەشتیاران بهێتە ڕێكخستن ژ بۆ وێ چەندێ هەموو لایەن ژ داهاتێ گەشتیاری د مفاداربن، چونكی ڕۆژانە ب سەدان گەشتیار ژ باشوور و ناڤەڕاستا ئیراقێ سەرەدانا زاخۆ دكەن.
شوكری نەجمەددین، خودان هاڤینگەهەكە ل زاخۆ بۆ ڕۆژناما ئەڤرۆ دیار كر، شۆفێرێن كۆستەران ب بهایێ 2٥ هزاران دچنە هەموو هاڤینگەهان، د دەمەكی دا چ خودان كۆستەر ب ڤی بهایێ كێم نە ڕازی نەچنە هەموو هاڤینگەهان، ژ نەچاری هەر خودان هاڤینگەهەكەك ژ مە نێزیكی 15 هەتا 20 هزار دیناران ددەتە شۆفێرێن كۆستەران، لێ د بنیات دا پێدڤیە خودان كۆمپانیێن گەشتیاری ڤی گۆژمێ پارەی بدەنە كۆستەران، كو پێشتر 100 هزار دینار ددانە خودانێن كۆستەران، لێ د نوكە دا ب تنێ 2٥ هزاران ددەنە وان و ئەو ژی ژ مە وەردگرن، ڤێ چەندێ ژی كاریگەری ل سەر مە كریە، لەوما ئەم دخوازن هاتنوچوونا گەشتیاران بهێتە ڕێكخستن.
سەلام شاهین، خودانێ هاڤینگەهەكا دی یە، دبێژیت:» شۆفێرێن كۆستەران دبێژنە مە ئەگەر هوون پارەی نەدەنە مە ئەم كۆستەرێن خوە یێن ڤەگۆهاستنا گەشتیاران نا ڤڕێكەینە هاڤینگەهێن وە، لەوما ئەم نەچار دبن 15 یان 20 هزاران بدەینە وان.
بێوار فەتاح، بەرپڕسێ ڕاگەهاندنا ڕێڤەبەریا گشتی یا گەشتوگۆزارێ ل زاخۆ، گۆت:»پشتی چەندین گلە و گازندەیێن وەلاتی و خودان جهێن گەشتیاری یێن زاخۆ گەهشتینەمە، ڕێڤەبەریا مە لگەل لایەنێن پەیوەندیدار ل سەرخەتە كو ب شێوەیەكێ ڕێكوپێك هاتنوچوونا گەشتیاران بهێتە ڕێكخستن».
