دێ ب ریفراندۆمەکێ چارەنڤیسێ خوە ل سووریێ دیار کەین
ب، سهرجان مەحمود:
ب هزاران وەلاتیێن دورزی ل سوەیدا دەست ب خوەنیشادانەکا مەزن کرن و دیار کرن، ئەو نەشێن ل گەل دەستهەلاتا نها یا سووریێ بژین و وان دڤێت ب رێیا ریفراندۆمەکێ چارەنڤیسێ خوە ل سووریێ دیار بکەن و دڤێت شام ژی رێزێ ل ئیرادەیا وان بگریت.
ب هزاران وەلاتیێن دورزی ل باژێرێ سوەیدایێ دەست ب خوەنیشادانەکا مەزن کرن و دیار کرن، پشتی کۆمکوژیێن ل سوەیدایێ و گرتنا گەلەک وەلاتیێن دورزی ب دەستێ دەستهەلاتا ئەحمەد شەرعی ئەو نەشێن ئێدی ل گەل سووریێ بژین و وان دڤێت چارەنڤیسێ خوە ب دەستێ خوە دیار بکەن و دڤێت هەموو وەلاتێن جیهانێ ژی رێزی ل بریارا گەلێ دورزی ل سووریێ بگرن.
وەلاتیێن دورزی دیار کرن وان دڤێت ب رێیا ریفراندۆمەکێ چارەنڤیسێ خوە دیار بکەن و ژ سووریێ جودا ببن، چونکی دستوورێ نها یێ سووریێ دستوورەک گەلەک توندە و ل دژی هەموو پێکهاتەیێن ل سووریێ یە و وەکو خەلکێ دورزی ئەو نەشێن د سیستەمەکێ دا بژین کو هەر رۆژ دشێت وەلاتیێن وان بکوژیت و زۆرداریێ ل خەلکێ دورزی بکەت و ژ بەر ڤێ یەکێ ژی باشترین چارەسەری ئەوە ب رێیا ریفراندۆمەکێ ئەو چارەنڤیسێ خوە دیار بکەن و دڤێت نەتەوەیێن ئێکگرتی ژی رێزێ ل بریارا گەلێ دورزی ل سووریێ بگریت.
ئەو یەک د دەمەکێ دایە کو بەری نها چەندین جاران رێبەرێ رۆحانی یێ دورزیان ژی دیار کریە، وان نەڤێت ل گەل دەستهەلاتا توندرەو یا نها ل شامێ بژین و وان دڤێت ژ سووریێ جودا بن، گرنگە نەتەوەیێن ئێکگرتی و وەلاتێن دی یێن جیهانێ ژی پشتەڤانیێ ل داخوازیا دورزیان بکەن و نەبنە پشتەڤانێن حوکمەتا توندرەو یا شامێ، کو بەری نها کۆمکوژی ل دژی دورزیان و گەلێ کورد ل سووریێ ئەنجام دایە و رێزێ ل داخوازایێن چو پێکهاتەیێن دی ل سووریێ ناگریت.
ئەو یەک د دەمەکێ دایە کو بەری نها ناڤەندا چاڤدێریا مافێن مرۆڤی یا سووریێ ژی دیار کربوو هێزێن سەر ب ئەحمەد شەرعی ل دەلیڤەیەکێ گەرن دا جارەکا دی ئێرشی باژێرێ سوەیدایێ بکەن، لێ حوکمەتا ئسرائیلێ ب توندی هۆشداری دایە ئەحمەد شەرعی و دیار کریە، هەکە هێزێن شامێ ئێرشی سوەیدایێ بکەن دێ ئسرائیل ئێرشی هەموو سازیێن حوکمەتا سووریێ کەت و ئسرائیل ب چو رەنگەکێ رێ نادەت شام ئێرشی دورزیێن سووریێ بکەت و دڤێت شام رێزێ ل ماف و داخوازیێن خەلکێ سوەیدایێ بگریت و ئێرشێن خوە ژی بدەتە راگرتن.
چاڤدێرێن سیاسی ژی دیار دکەن، هەبوونا ئسرائیلێ ل باشوورێ سووریێ پشتەڤانیەکا گەلەک مەزنە بۆ دورزیان، چونکی ئسرائیل ب هەموو رەنگەکێ پشتەڤانیێ ل مافێن دورزیان دکەت و هەروەسا ئسرائیلێ دڤێت بابەتێ دورزیان وەکو کارتەکا فشارێ ل دژی شامێ بکار بینیت و ژ بەر ئسرائیلێ ژی هەتا نها شامێ نەشیایە باژێرێ سوەیدایێ داگیر بکەت، نها ژی دورزیان دڤێت ب پشتەڤانیا ئسرائیلێ پێگەهێ خوە ل سووریێ بهێز بکەن و هەکە پشتەڤانیا ئسرائیلێ بەردەوام بیت و ئەمریکا ژی پشتەڤان بیت نە دوورە د دەمەکێ گەلەک نێزیک دا هەرێمەکا دورزیان ل سووریێ بهێتە راگەهاندن.
ل گۆر باوەریا چاڤدێرێن سیاسی سیستەمێ نها یێ سووریێ بەردەوام نابیت، راستە نها د ناڤبەرا هەسەدێ و شامێ دا دانوستاندن هەنە و قووناغا ئینتیگراسیۆنێ ژی بەردەوام دکەت، لێ گەلێ کورد ل سووریێ ژ رەوشا نها رازی نینن، چونکی کوردان د شەرێ ل دژی داعشێ و هێزێن شەرعی دا پتر ژ بیست هزار شەهید دان و نها چو مافێن گەلێ کورد ل سووریێ نەهاتیە گەرەنتیکرن و هەکە نها بۆ دەمەکێ کورت ژی چو ئاریشە روو نەدەن، لێ د پاشەرۆژێ دا دێ ئالۆزیێن مەزن د ناڤبەرا شامێ و کوردان دا روو دەن، چونکی کورد قەبوول ناکەن پشتی وان قوربانیێن مەزن بێی کو بگەهنە چو مافەکێ ل سووریێ بژین.
گەلەک ژ چالاکڤانێن کورد یێن خەلکێ رۆژئاڤایێ کوردستانێ ژی رۆژانە ب رێیا تۆرێن جڤاکی نەرازیبوونا خوە ل هەمبەر رەوشا نها یا رۆژئاڤایێ کوردستانێ دیار دکەن و ئاماژە ب ڤێ یەکێ دکەن کو یا نها دهێتە کرن رادەستکرنا ئیرادەیا گەلێ کوردە ل سووریێ و ئەو ب توندی ل دژی رێککەفتنا ل گەل شامێ نە، چونکی هەتا نها ژی شامێ هەبوونا گەلێ کورد ل سووریێ قەبوول نەکریە و ل دژی پەروەردەیا ب زمانێ کوردی یە، هەکە شام ل دژی مافێن رەوا یێن گەلێ کورد بیت بۆچی دڤێت هەسەدە و رێڤەبەریا خوەسەر هەموو داخوازیێن شامێ بجه بینن د دەمەکێ دا کو یا شام نها دکەت ب تەمامی ژ بۆ نەهێلانا ئیرادەیا گەلێ کوردە، ژ بەر ڤێ یەکێ ژی دڤێت هێزێن نەتەوەیی یێن ل رۆژئاڤایێ کوردستانێ ل دژی رێککەفتنا هەسەدێ و شامێ هەلوەستەک توند نیشا بدەن.
