د یاسایا ئاشتیێ دا چو تشتێن دلخوەشکەر بۆ کوردان نینن
سیاسەتمەدارەکێ تورکیا یێ نێزیکی ئاکپارتیێ دیار دکەت، یاسایا ئاشتیێ دێ بۆ دەمێ سالەکێ بیت و وی دەمی هەر ئەندامەکێ پەکەکێ ڤەگەریتە تورکیا دێ بۆ دەمێ ٥ سالان ل ژێر چاڤدێریێ دا بیت و پاشی ژی دێ د سازیێن خزمەتگوزاریێ دا هێتە دامەزراندن.
شامیل تەیار ئەندامێ بەرێ یێ پەرلەمانێ تورکیا و سیاسەتمەدارێ نێزیکی ئاکپارتیێ دیار کر، چارچۆڤەیێ یاسایا ئاشتیێ تەمام بوویە و دێ د دەمەکێ نێزیک دا ل پەرلەمانی گەنگەشە ل سەر یاسایێ هێتە کرن و یاسا ژ ١٥ ماددەیان پێکهاتیە و گۆت: (د یاسایێ دا چو تشتەک سەبارەت ب چارەسەرکرنا پرسا کوردی نینە، بەلکو یاسا بۆ سالەکێ هاتیە دانان و د ناڤ سالەکێ دا کو دبیت پاشی دەمێ وێ بهێتە درێژکرن ژی هەر ئەندامەکێ پەکەکێ ڤەگەریتە تورکیا دێ تنێ بۆ دەمێ ٥ سالان ل ژێر چاڤدێریێ دا بیت و ناهێتە دەستەسەرکرن).
ناڤهاتی ئەو یەک ژی دیار کر، ئەندامێن پەکەکێ یێن کو ڤەگەرنە تورکیا دێ بۆ دەمێ ٥ سالان ل ژێر چاڤدێریێ دا بن و پاشی ژی دێ د ناڤ سازیێن دەولەتێ دا ب تایبەتی ژی سازیێن خزمەتگوزاریێ هێنە دامەزراندن، لێ جارێ دەلیڤەیا پشکداریا د کاروبارێن سیاسی دا ب وان کەسان ناهێتە دان، ئانکۆ ب کورتی مرۆڤ دشێت بێژیت یاسایا ئاشتیێ تنێ ژ بۆ ڤەگەرا ئەندامێن پەکەکێ هاتیە ئامادەکرن و گۆت: (ژ بۆ چارەسەرکرنا پرسا کوردی جارێ چو تشتێن دلخوەشکەر د یاسایا ئاشتیێ دا نینن، لێ ئۆجەلان و بەرپرسێن دەم پارتی وەسا دبین ئەڤە پێنگاڤا ئێکێ یە و پاشی دێ یاسایەکا دی یا بەرفرەه ژی هێتە دەرخستن و وی دەمی دبیت گەلەک تشتێن دی بهێنە ئێکلا کرن).
سەبارەت ب چارەنڤیسێ بەرپرسێن پەکەکێ ژی ناڤهاتی دیار کر، ڤەگەرا زێدەتر ژ ٢٠٠ بەرپرسێن پەکەکێ بۆ تورکیا جارێ دهێتە راگرتن، ئانکۆ ئەو کەسە نەشێن د رەوشا نها دا ڤەگەرنە تورکیا، هەروەسا دڤێت بەرپرسێن پەکەکێ ب چو رەنگەکێ کار و خەباتێن سیاسی ژی ل دژی تورکیا نەکەن و پاشی دەمێ یاسایەک نوو دەرکەڤیت وی دەمی دهێتە چاڤەرێکرن کو بابەتێ ڤەگەرا وان ژی بهێتە گەنگەشە کرن.
سەبارەت ب رەوشا ئۆجەلانی ژی سیاسەتمەدارێ تورکیا دیار دکەت، ئۆجەلان جارێ دێ ل ئیمرالیێ بیت و ل وێرێ دێ رەوشا وی هێتە باشکرن، دبیت رێ بهێتە دان رۆژنامەڤان و شاندێن سیاسی سەرەدانا وی بکەن، ئانکۆ دێ رەوشا وی باشتر بیت، لێ جارێ دێ ل ئیمرالیێ مینیت و بەری نها ئۆجەلانی بخوە ژی دیار کریە کو وی دڤێت ل ئیمرالیێ بمینیت و گۆت: (ب گشتی دێ ب دەرخستنا یاسایا ئاشتیێ هندەک گوهۆڕینێن باش ل تورکیا روو دەن، لێ سەبارەت ب چارەسەرکرنا پرسا کوردی جارێ چو تشتێن دلخوەشکەر نینن و دڤێت چاڤەرێی یاسایەکا دی بین).
