ئیراق تووشی ئاستەنگەكا دارایی یا گران بوویە
پەیڤدارێ حوكمەتا ئیراقێ ئاشكرا دكەت، ڤالاهییەكا مەزن د ناڤبەرا داهاتێ وەلاتی و خەرجیێن مووچەی دا هەیە و وەزارەتا دارایی بۆ پڕكرنا وێ كێماتیێ پەنایێ بۆ قەرێن ناڤخۆیی دبەت.
حەیدەر عەبوودی، پەیڤدارێ حوكمەتا ئیراقێ د داخریانییەكا تەلەڤزیۆنی دا راگەهاند، ئیراق تووشی ئاستەنگەكا دارایی یا گران بوویە. ئاماژە ب وێ كر، حوكمەت مەهانە پێدڤی ب 8،10 ترلیۆن دینارانە بۆ دابینكرنا مووچەیێن فەرمانبەران و خەرجیێن گشتی، د دەمەكێ دا كو داهاتێ وەلاتی ژ هنارتنا پەترۆلێ تنێ نێزیكی 5،2 ترلیۆن دینارانە.
پەیڤدارێ حوكمەتا ئیراقێ دوپاتی ل وێ چەندێ كر، ئەڤ ڤالاهییا دارایی یا مەزن ژ بەر وێ شۆكا ئابۆری یا پەیوەندی ب قەیرانا تەنگئاڤا هورمزێ ڤە هەی، دروست بوویە. هەروەسا راگەهاند، ئەو ئامارێن بەرێ ژ ئالیێ وەزیرێ ساخلەمیێ ڤە ل دۆر قەبارەیێ پێدڤییێن دارایی هاتبوونە بەلاڤكرن، د دروستن و جوداهییا د ناڤبەرا داهات و خەرجییان دا گەلەكا مەزنە.
ل دۆر بزاڤێن بەغدایێ بۆ دەربازبوون ژ ڤی رەوشێ، حەیدەر عەبوودی گۆت»وەزارەتا دارایی كار ل سەر چارەسەریێن ناڤخۆیی دكەت، ژ وان ژی فرۆتنا سەنەدێن گەنجینێ و قەرێن ناڤخۆیی، داكو رێگریێ ل وێ بكەت ئیراق پەنایێ بۆ قەرێن دەرەكی ببەت».
د دووماهییا ئاخڤتنێن خۆ دا، پەیڤدارێ حوكمەتا ئیراقێ دانپێدان ب وێ كر كو ئەڤ قەیرانا دارایی كارتێكرن ل سەر دەمێ بەلاڤكرنا مووچەی كریە و بوویە ئەگەرێ پاشئێخستنا وێ، ب شێوەیەكێ كو وەك مەهێن بۆری ب رێكوپێكی ناهێتە بەلاڤكرن هەتا ئەو كێماتییا دارایی دهێتە پڕكرن.
