بۆ شنگالێ
خالد عەلی سلێڤانەیی
چیا وەك پێدڤی
یێ بلند نەبوو
و ئەسمانی وەك پێدڤی
خۆ نێزیك نەكر…
جیهان ژی
تێرا خۆ بێدەنگ بوو…
***
وێ سپێدەهیێ
نە بتنێ دەرگەهـ هاتن شكاندن
ناڤ ژی شكەستن..
ئەو ناڤێن رێكا ئاڤێ
و زەڤی و بیستانان
و بیرەوەری
ژبەركرین…
ژ وێ ڕۆژێ وەرە؛
زاڕۆك
ژ تەمەنێن خۆ مەزنتر لێ هاتن
دایك
ژ خەمێن خۆ ناخ ب ژانتر
و شەڤ درێژتر لێهاتن…
درێژ كو ستێر ڤێچا گیرۆ دبن
و هەیڤ مینا كەڤرەكێ ڕەق
وەك دلێ مرۆڤایەتیێ
خویا دبیت..
***
دەوروبەرێ چیایی
گوند تالان و سۆتی..
دەرگەهێن ڤەكری
یێن خانیان
دەستێن خۆ بلند دكرن
هەروەكو دزانین
كەس ناڤەگەڕیت.
***
ئاخ یا دئاخڤیت
هێدی دئاخڤیت
هەر جار
كلۆخەكێ
گوستیرەكێ
ناڤەكێ
دكەت د چاڤێن جیهانێ دا..
***
12 سال
ب دەمی ناهێن هژمار؛
ب جهێن ڤالا
ب هژمارا ڤەجنقینا دایكان
و كابووسكێن زاڕۆك هەر شەڤ دبینن.
***
سلاڤ بۆ:
یێن ئۆغەر بووین
یێن ڤەدر بووین
یێن قورتال بووین
یێن ئازاد بووین
كو تەمەنێ مایی هەمیێ
ب بزاڤن
جارەكا دی ژ رابۆری
قورتال بن.
