گونەها قەدەرێ
فەهیما ئیبراهیم
تو شەبەنگەک بووی ژ بارانێ، و ئەز ژی خوناڤا گولەکێ بووم. ل زڤستانەکا سار پەرمیچکێن بەفرێ ب سەر مەدا بارین. تو ل سەر سنوورێن خەونێن من یێ دانای بووی، ژ نیشکەکێ ڤە من تو دیتی، دیسان تو بەرزەبووی، ل بەندا من بووی و ئەز ژی ل بەندا تە بووم. چاڤپێکەتنا مە دا بتە دەستپێکا چیڕۆکەکێ، لێ قەدەرێ ب ئازاران دارێژت بوو.
دگەل بیرهاتنێن خوە دئاخڤم، درەڤم و د جهـ دا دمینمە ئاسێ، پێ یێن من د گرێداینە، لێ دلێ من بەرەف ئاسۆیێن دوور دچت. تو ل بیرا من بووی، پاشی تووڕە دبووم، لێ من دڤیا وینەیێ تە د بیردانکا من دا شێلی نەبت، پەیڤێن کریت دەربارەی تە نا نڤیسم. ژ دەستدانا تە مەزنترین شکەستن بوو، هەروەکو هاتیمە نەفیکرن، من گۆت بوو تە تو هەموو کەسی و کەس جهێ تە ناگرت. ئێدی چ تشت کارتێکرنێ ل هەستێن من ناکن، د سینگێ من دا دلەکێ مینا کەڤرەکێ رەق مایە.
ئو تو… ئاخ هەکەر تو بزانی تە چ ل من کرییە؟
تا دەمێ من کەرب ژی ژ تە ڤەدبن، حەز ناکم کەس بەحسا خرابیێن تە بکت. نە خەمێن من و نە ئازار و نە کەرب و کینێ وێرەکی هەیە تە ل هەنبەر من بشکێنن.
من حەزکرن نەبوو خاترا خوە ژ تە بخوازم و نە ژی ژ هزرێن من دووربکەڤی، تو ئەو برین بووی یا من حەزا ساخبوونا وێ نەیی، من حەزدکر هەردەم ل بەر چاڤێن من بی… تو هیڤییەک بووی ب بانێ ئەسمانی ڤە هەلاویستی، نە دەستێ من دگەهشتێ و نە ژی تە ئنیەتا بارینێ هەبوو؛ كو ببیە بارانەکا ئۆمێدان و بباری هنداڤ هیڤی یێن من.
دەمێ دووماهیک خاترخواستن دهێتە بیرا تە؟ دلێ من ژ ئازاران پارچە پارچە دبوو، من هزردکر هەمبێزا تە دێ چوونا تە ل سەر من سڤک کت. چەوان هەر تشت هۆسا ب ساناهی دەرباز بوو؟!
پاشی هەمبێزا تە بۆ خەریبی، ئەو هەموو ئاخفتن و سوحبەتێن مە بوونە بێدەنگی، ئەز ل کێلیکەکێ دگەڕیام بۆ ڤەگەڕیانێ، تە ژی دوورکەتن هەلبژارت، ل بەندا داهێلانا دەستێن تە نە بووم، لێ خەریبی ژ لاڤایێن من بلەزتر بوو.
دناخێ مندا لاپەڕەک ما ڤەکری، لێ چ بیرهاتن نەمان ل سەر بهێنە نڤێسین، بتنێ تاکە ڕێ ژبیرکرن بوو. سەرێ خوە بلند کر، دێمێ خوە یێ سۆتی د خۆدیکا ڕۆناهیێ ڕا دیت. ئازارێن هندە سالان د کێلیکەکێ دا هاتنە دیتن.
وێ دڤیا ژ رابردووی ب رەڤت، لێ هەر تشت مینا سیتاڤکا وێ ب دووڤە بوو. ئەو ڕۆژا پێخەمەت وی ئەوێ دولکێ گازێ ب خوەدا کری و پتریا لەشێ وێ سۆتی. هزرا رەڤینێ دکر وێ نە دزانی دێ د ناڤ ئاگرەکێ هەتا هەتایێ دا سۆتی مینتە ساخ، وێ باوەرنەدکر ئەو ژی دێ پشتا خوە دتە وێ هەروەکو رۆژەکێ ئەو نە نیاسی.
