فوئاد حوسێن: ئیراق یا پێگیرە ب ئاڤەدانكرنا شنگالێ و قەرەبووكرنا رزگاربوویێن ئێزدی
د سالڤەگەرا 12 یا جینۆسایدا ئێزدییان دا كو ل باژێڕێ هەولێرێ برێڤە چووی، فوئاد حوسێن، جێگرێ سەرۆك وەزیران و وەزیرێ دەرڤە یێ ئیراقێ، پەیڤەك پێشكێش كر و تێدا دوپاتی ل سەر بزاڤێن بەردەوام یێن حوكمەتا فیدرال و حوكمەتا هەرێما كوردستانێ كر بۆ ساخكرنا برینێن پێكهاتەیا ئێزدی و دادگەهكرنا تاوانباران.
د دەسپێكا پەیڤێ دا فوئاد حوسێن سلاڤ و رێزێن عەلی زەیدی، سەرۆك وەزیرێن ئیراقێ گەهاندنە بەرهەڤبوویان و راگەهاند كو ئەو ب نوونەراتییا وی پشكداریێ د ڤێ هەلكەفتێ دا دكەت. هەروەسا سوپاسییا حوكمەتا هەرێما كوردستانێ كر بۆ رێكخستنا ڤێ هەلكەفتێ و بخێرهاتنا مەسرور بارزانی، سەرۆكێ حوكمەتا هەرێما كوردستانێ كر.
وەزیرێ دەرڤەیێ ئیراقێ ئاماژە ب وێ چەندێ كر، ئەڤرۆ بۆ بیرئینانا بیرهاتنەكا تژی ئازار كۆمبووینە كو بەری 12 سالان ب سەر ئیراقێ و هەرێما كوردستانێ دا هات. وی باسێ زنجیرە تاوانێن دیرۆكا ئیراقێ كر، ژ وان ژی: دەربەدەركرنا ب زۆرێ یا كوردێن فەیلی ل سالا 1980و بەرزەكرنا 12 هزار گەنجێن وان، جینۆسایدا بارزانییان و بەرزەكرنا هەشت هزار كەسان، و تاوانا ئەنفالێ و هەلەبجە.
فوئاد حوسێن رۆهنكر ژی، ئەڤ تاوانە یێن بەردەوام بوون هەتا گەهشتینە رێكخراوا تیرۆرستییا داعشێ، كو خواست رەنگاورەنگییا جڤاكێ ئیراقێ تێك بدەت، ب تایبەتی ئەو تاوانا ل شنگالێ ئەنجامدای كو دژی سادەترین پرەنسیپێن مرۆڤایەتیێ بوو. دوپات كر ژی كو چاڤنەترسی و قوربانیدانا گەلێ ئیراقێ و هێزێن پێشمەرگەی، تیرۆرست بێهیڤیكرن و پلانێن وان شكاندن.
د پشكەكا دی یا پەیڤا خۆ دا، پەسنا رۆلێ هێزێن ئەمنی و ب تایبەتی هێزێن پێشمەرگەی كر ل رزگاركرنا دەڤەران و ژناڤبرنا تیرۆرێ و زڤڕاندنا تەناهیێ. ئاماژە ب وێ چەندێ ژی كر، ویژدانا نیشتیمانی چو جاران وان تاوانان ژبیر ناكەت یێن كو داعشێ ب شێوەیەكێ رێكخستی دەرهەقێ ئێزدییان ئەنجامداین.
دەربارەی پێنگاڤێن حوكمەتا ئیراقێ، فوئاد حوسێن راگەهاند كو پلانەكا گشتگیر هەیە بۆ ڤەگەڕیانا ئاوارەیان و ئاڤەدانكرنا شنگالێ. ئاماژە ب بجهئینانا «یاسایا رزگاربوویێن ئافرەتێن ئێزدی» كر كو قەرەبووكرنا دارایی، دابینكرنا ئەرد و خانییان، و چێكرنا رەوشا دەروونی بۆ قوربانییان ل خۆ دگریت.
هەروەسا دوپاتی ل سەر بەردەوامییا بزاڤان كر بۆ ئاشكراكرنا چارەنڤیسێ رەڤاندییان و ڤەكرنا گۆرێن ب كۆم و ناسینەڤەیا تەرمێن قوربانییان ب گۆرەی پیڤەرێن نێڤدەولەتی. گۆت ژی: وەزارەتا دەرڤە ب رێكا نوونەراتیێن دیپلۆماسی كار دكەت دا كو ئەڤ دۆسییە ل سەر ئاستێ نێڤدەولەتی ب زیندی بمینیت و چو تاوانبار ژ سزایێ خۆ قورتال نەبن.
فوئاد حوسێن دوپات كر، پاراستنا پێكهاتەیان و رەنگاورەنگیێ بژارەیەكا نیشتیمانی یە بۆ پاراستنا ئێكپارچەییا ئیراقێ، و كار دكەن بۆ پێشئێخستنا كەلتوورێ لێبۆرینێ و پێكڤەژیانێ دا كو رێگری ل دووبارەبوونا ڤان جۆرە تاوانان بهێتە گرتن.
