شەهریاشەهریا
مهاباد ئەنوەر یاسین
ڕۆندكا ژ چاڤێ من هاتی جهەك هەژیی نەدیت بكەڤیت، ئەو نە بتنێ ڕۆندكەكە، ئەو 56 سالێن ژیێ منێ بێ مالە، ڕۆژا (سماعیلێ حمێ) گۆتی ژ ئاخا خوە دەرناكەڤم، جەندرمەیا چ ل جەنازێ وی كرن نزانین، بەلێ هەمی چركەیێن وێ ڕۆژێ ل بیرا من ماینە، بێ مال و حال چووینە عێراقێ، ئاتێشی وەسا دەستێ من گرتبوو د پاراستم ژ هەمی دونیایا، ئەم تێدا خەمێن خوە دكەینە كراسەكێ گول گولی ل دیلانا پێ بەژنا خوە ڕەنگ دكەین. ئەوێن ڕۆنشتی دبن شەیدایێ جوانیا نەهاتی دیتن و ئەز شەیدا و دلدارا دێمێ هەڤژینێ خوە بووم. ئاخەكا نوی مە كرە جهێ ژیانێ، وەكی هەمیان ستوونێن چادرا خوە مە قوتانە د ئاخێ دا، ژنان حەسیدی پێ دبرن، من بخوە ژی هەمی تەمەنێ خوە ب دیتنا وی دێمێ دناڤ دا عاشق بوویم دبر.
ئاتێش پشتی سالێن دویر و درێژ زڤڕی ناڤ كاڤلە خانیێن هاتینە ژبیركرن، یازدە هەیڤا هاتە زیندان كرن… ئەم ژی زیندانی یێن ئازادبووین، هەتا ژ زیندانێ دەربكەڤیت مە دەست ب نوژەنكرنا كاڤلە خانیێ بابێ من كر. گاز و غاز لڤێرە گرانن و پارێ كڕینا وان ژی مە نینە. ژنەكا تێر تەمەنم، 56 سالم بەلێ عەشقا ئارتێشی وەكو خوەیە، لسەر كورسیكێ بەرامبەر پەنجەرا ب دەپان لێگدایی ڕوونشتم، ب دەستێن خوەیێن بێ سەروبەر درواری كر، سەرەرایی كو پشتا من دئێشت. ڕۆژەكێ خودێ ژ ژنكا جیرانا مە رازی بیت گۆت: هەیڤێ 10 ڕۆژا دچینە عێراقێ، هەر جارەكێ بهایێ (4 ملیارا) فایدە دكەین، بۆچی تو ژی ناهێیی؟
وێ شەڤی ژ كەیفادا گەلەك نەنڤستم و هەر دناڤ خەیالا دا دچووم. ئەڤ جارە بچم زیندانێ دێ ب دلەكێ خوەش بەحسێ ڤان ڕۆژا بو ئاتێشی كەم. دگەل هەلاتنا ڕۆژێ گەهشتین بەر دەرگەهێ سنووری. زمانێ توركی باش نزانم ! چەندرمە كرێت تەماشەیی مە دكەن؟ چونكی كوردین. و ڕەخێ دی ژی كرێت سەحدكەنە مە ژ بەركو ژن نینن كارێ قوروجی یێ دكەین، ڕۆندكا چاڤێن من ل بلنداهیێ ما و تامكرە تەحلاتیا ژیانێ. ئەو خوەلیسەریا ئەم بۆ دژین، دا چ ل ڤێ تێگەهشتنێ كەم؟ ئەوا زاڕۆكێن مە ژ برسادا دمرن؛ دمینن پێخاس و بێ جلك. ئەو ب چاڤەكی سەحدكەن مە و ئەم ب چاڤەكێ دی، بەفر وەسا هات وەكی دێ خلاس بیت هەكە راوەستابا؛ جهەك نەما سپی نەكری، تڕومبێلامە د نیڤا رێكێ دا ئاسێ ما، ب دلێن تژی خەمباری گەهشتین بەر دەرگەهێ مالەكێ.
دەرگەهێن مالا خوە بۆ مە ڤەكرن، مە ژی بەحسێ ژیانا خوە بۆ دكر، وەكی ئەم ژ كەوكەبەكا دی هاتبین وەسا ب مەرەق گوهداریا دەردەسەریێن مە دكر، وێ ڕۆندكێ چ ئاخێن پاقژ نەدیتن دا بن ئاخ بیت، هەر گاڤا ئارتێش هات دێ دناڤ دەستێن وی دا بن ئاخ كەم.
