ئیران: تەنگا هورمزێ وەسا ب ساناهی ڤەناکەین
پەیڤدارێ سوپایێ پاسداران یێ ئیرانێ دیار کر، نها دانوستاندن د ناڤبەرا وان و ئەمریکا دا هەنە و هەتا نها ژی رێککەفتن نەهاتیە کرن، هەتا ئەمریکا هەموو مەرجێن ئیرانێ قەبوول نەکەت دەرتەنگا هورمزێ ژی ناهێتە ڤەکرن و گرنگە ئەمریکا پێداچوونێ د هەلوەستێ خوە دا بکەت.
حسێن موحێبی ئەو یەک ژی دیار کر، دەرتەنگا هورمزێ پارچەیەکە ژ هێزا ستراتیژی یا ئیرانێ و ئیران ب چو رەنگەکێ کارتا دەرتەنگا هورمزێ ژ دەست نادەت و دێ ب هەموو رەنگەکێ ژی وێ کارتێ بکار ئینیت و نها دڤێت ئەمریکا هەموو مەرجێن ئیرانێ قەبوول بکەت، دڤێت بەری هەر تشتەکێ ئەمریکا دۆرپێچا دەریایی ل سەر ئیرانێ راکەت و هەموو هێزێن خوە ژ نێزیکی دەرتەنگا هورمزێ ڤەکێشیت و دڤێت ئەمریکا ئێدی قەبوول بکەت کو کۆنترۆلا دەرتەنگا هورمزێ دێ هەردەم د دەستێ ئیرانێ دا بیت و ئەمریکا د رێڤەبرنا وێ دا چو رۆل نابن.
ناڤهاتی د دووماهیا ئاخڤتنا خوە دا ئەو یەک ژی دیار کر، ئیرانێ دڤێت پەیوەندیێن خوە ل گەل هەموو وەلاتێن دەڤەرێ باش بکەت، گرنگە وەلاتێن دەڤەرێ ژی نەبنە پشکەک ژ سراتیژیا شەڕی یا ئەمریکا و ئسرائیلێ ل دژی ئیرانێ، چونکی ئەمریکا و ئسرائیلێ د شەڕێ ل دژی ئیرانێ دا تووشی شکەستنێ هاتن و نها نەچارن ل گەل ئیرانێ دانوستاندندنان بکەن و ژ بۆ ڤەکرنا دەرتەنگا هورمزێ ژی دڤێت ئەمریکا هەموو مەرجێن ئیرانێ قەبوول بکەت.
