دیندار زێباری: دڤێت تاوانێن داعشێ ب جینۆساید بێهنە ناساندن
رەمەزان زەكەریا:
ڕێكخەرێ ڕاسپاردەیێن نێڤدەولەتی ل حكومەتا هەرێما كوردستانێ ئاشكراكر، ئەركێ جڤاكا نێڤدەولەتی و حكومەتا فیدرال یا ئیراقێ یە، دادگەهكرنا تاوانبارێن داعشێ ب تۆمەتا جینۆساید، تاوانێن دژی مرۆڤایەتیێ و تاوانێن جەنگی پاش نەئێخن.
دكتۆر دیندار زێباری، ڕێكخەرێ ڕاسپاردەیێن نێڤدەولەتی ل حكومەتا هەرێما كوردستانێ راگەهاند: ل گۆر بەلگە و بڕیارێن نێڤدەولەتی، ئەو تاوانێن دەرهەق كوردێن ئێزدی و پێكهاتەیێن دی هاتینە ئەنجامدان، جینۆساید و تاوانێن دژی مرۆڤایەتیێ نە و ناهێنە ژبیركرن، د ڤێ كارەساتێ دا شەش هزار و 417 كەس هاتنە ڕەڤاندن، هەتا نوكە ب بزاڤێن نڤسینگەها ڕزگاركرنا رەڤاندیان سێ هزار و 595 رەڤاندی هاتینە ڕزگاركرن و هێشتا چارەنڤیسێ دو هزار و 526 رەڤاندیێن ئێزدی دیار نینە، هەروەسا نێزیكی پێنج هزار ئێزدی شەهید بوون و ب سەدان هزار وەلاتی نەچار بوون مال و گوندێن خۆ بجه بهێلن و ئاوارە ببن.
زێباری گۆت: «حكومەتا هەرێما كوردستانێ، دەرگەهێ هەرێما كوردستانێ ب ڕوویێ ئاوارەیان دا ڤەكر، كەمپ ئاڤاكرن، خزمەتگوزاریێن دەستپێكی دابینكرن و بزاڤكرن دا ژیانا قوربانیان بپارێزیت».
