ئارێشەیا حەواندنا گەشتیاران ل ئاكرێ دێ هێتە چارەكرن
رەمەزان زەكەریا
بۆ ئێكەمجار پرۆژەیەكێ مەزن یێ گەشتیاری ب ناڤێ ئاكرێ ڤیو ب گۆژمێ 350 ملیۆن دۆلاران ل ئاكرێ دهێتە دروستكرن، كو شیانێن ل خۆگرتنا دو هزار كەسان بۆ مانەڤێ هەیە و ئاریشەیا نەبوونا هۆتێلان ل باژێڕی چارەسەر دكەت.
كۆڤان جەلال، سەرپەرشتێ پرۆژەی ڕاگەهاند: سەرباری وێ چەندێ خەلكێ ئاكرێ ب میڤاندۆستی دهێنە ناسین، بەلێ باژێڕ وەك دەڤەرەكا دیارا گەشتیاری هەتا نوكە هۆتێلەكا وەسا مەزن نەبوویە دا كو گەشتیار شەڤانە تێدا بمێننەڤە، ئەڤێ چەندێ ژی وەكرییە ئەو پاسێن گەشتیاری یێن سەردانا ئاكرێ دكەن، نەچار ببن بۆ مانەڤێ ڤەگەڕنە هەولێرێ یان بچنە باژێرێن دی یێن كوردستانێ.
ناڤبری گۆتژی: كابینا نەهێ ب ڕێكا پشتەڤانیكرنا كەرتێ تایبەت ڤێ ئاریشەیێ چارەسەر دكەت و پرۆژەیەكێ گرنگ و ستراتیژی یێ گەشتیاری ب ناڤێ ئاكرێ ڤیو جێبەجێدكەت.
ناڤهاتی گۆت: پرۆژە ب گوژمەیێ 350 ملیۆن دۆلاران دهێتە دروستكرن و پێكهاتییە ژ هۆتێل، مۆتێل، شوقەیێن مۆبیلیاتكری، چێشتخانە، دەڤەرا كەسك، تاڤگە، و یاریگەها زارۆكان، كو ب گشتی شیانێ مانەڤێ بۆ دوو هەزار كەسان تێدا دهێتە دابینكرن.
خویاكر: جێبەجێكرنا پرۆژەیێ مەزن دێ بیتە ئەگەرێ ڕەخساندنا سەدان دەلیڤەیێن كاری بۆ گەنجێن باژێڕی، هەروەسا گۆڕانكاریەكا مەزن د بارودۆخێ ئابووری و كەرتێ گەشتیاری یێ ئاكرێ دا دروست دكەت و دبیتە پشتەڤانەكێ ب هێز بۆ پێشوازیكرنێ ل گەشتیارێن ناڤخۆیی و بیانی، پرۆژە هەتا حەفت سالێن دی ب ئێكجاری دێ تەمام بیت.
