گەنجەکێ زاخۆ ٢٥ سالە کەلوپەلان ژ بنێ ئاڤا خابویری دئینیتە دەر
زاخۆ، دلۆڤان هالۆ:
گەنجەکێ زاخۆ یێ ناسیار ب هەرمان زاخۆیی بۆ ماوێ 25 سالانە بەردەوام کەلوپەلێن جۆراو جۆر ژ بنێ ئاڤا خابیرێ زاخۆ دئینیتە دەر و ل دووماهییێ ژی چەندین گولەیێن هاونان یێن سەر دەمێ رژێما بەعس ل نێزیك پرا شەهابی ژ بنێ ئاڤا خابیری ئیناینە دەر، داخوازیا وی ئەوە کو ببیتە نقومڤانەکێ زاخۆ
هەرمان زاخۆیی، د دیدارەکێ دا بۆ ڕۆژناما ئەڤرۆ دیار کر، هەر ل ژییێ زاڕۆکینیێ و ل وەرزێ هاڤینێ ب مەرەما مەلەڤانیان ئەز بەردەوام دچوومە سەر خابیرێ زاخۆ، هەر ژ هینگێ هەتا نوکە دبنە 25 سال کو ئەز کەلوپەلێن جۆراو جۆر ژ بنێ ئاڤا خابیرێ زاخۆ دئینمه دەر.
ناڤهاتی ئاماژە ب وێ چەندێ ژی کر، من گەلەك جۆرێن کەلوپەلان ژ بنێ ئاڤا خابیرێ زاخۆ ئیناینە دەر، وەکو ڕۆمانە و مۆبایل و گۆستیرك و ڕستك و دەمژمێر و بازنك و چەندین کەلوپەلێن دی، هەردیسا من گەلەك نڤشتی ژی ئیناینە دەر و برینە دەف مامۆستایێن ئاینی و پێڤە خواندینە و پشتی هینگێ من سۆتینە، ل ڤێ دووماهیێ ژی من چەندین گولەیێن هاونان یێن سەردەمێ رژێما بەعس ل نێزیك پرا شەهابی ژ بنێ ئاڤا خابیرێ زاخۆ ئیناینە دەر.
گۆت ژی:»بنێ ئاڤێ گەلەك یا ب مەترسیە، چونکی شەبەکە و ئاسن یێن تێدا هەین و یا ژ هەمیان مەترسیدارتر ژی سیم یێن تێدا هەین، بتنێ من ئێك داخوازی هەیە کو ئەو ژی من بکەنە نقومڤان، هەر چەندە پێشتر من چەندین جاران ئەڤ داخوازیا خوە ل تۆڕێن جڤاکی بەلاڤکریە لێ هەتا نوکە چ لایەنان بەرسڤا ڤێ داخوازیا من نەدایە».
