دەستوورێ ئیراقێ نەخشەڕێیەكێ گونجایە بۆ چارەسەركرنا هەموو كێشەیان
ل پیرمام سەرۆك بارزانی ل گەل سەرۆك و ئەندامێن جڤاتا پارێزگەها سەلاحەدینێ كۆمبوو.
بارەگەهێ بارزانی بەلاڤكر» د كۆمبوونێ دا شاندێ مێڤان، زێدەباری پیرۆزباهییا هەشتێ سالییا دامەزراندنا پارتی دیموكراتی كوردستان، پێزانینێن خوە بۆ ڕۆلێ سەرۆك بارزانی هەبوون د خەبات و دیرۆكا گەلێ كوردستانێ و ئاڤاكرنا ئیراقا نوو دا. هەروەسا سوپاسییا سەرۆك بارزانی كرن كو هەرێما كوردستانێ د دەمێ هێرشێن تیرۆرستێن داعشێ دا پێشوازی ل ئاوارەیان كر و وەك نموونەیەكا بلند یا مرۆڤدۆستی و برایەتی و هەست ب بەرپرسایەتیێ ناڤبر».
بارەگەهێ بارزانی ئاماژە ب وێ كرییە، شاندی قوربانیدانا هێزێن پێشمەرگەیێن كوردستانێ و دامودەزگەهێن هەرێمێ د شەڕێ تیرۆرستێن داعشێ دا و مسۆگەركرنا ئارامی و ئاسایشێ ب بلند هەلسەنگاند، هەروەسا داخواز كرن هەماهەنگی د ناڤبەرا یەكەیێن ئیداری یێن پارێزگەها سەلاحەدینێ و پارێزگەهێن هەرێمێ دا هەبیت بۆ مفا وەرگرتنێ ژ سەربوورێن ئیداری و ئاڤەدانییا هەرێما كوردستانێ.
هەر د وێ كۆمبوونێ دا سەرۆك بارزانی ب گەرمی بخێرهاتنا شاندێ مێڤان كر و دەستخوەشی لێ كرن بۆ وێ هەماهەنگی و كارێ هەڤپشك یێ د ناڤبەرا پێكهاتەیێن نەتەوەیی و ئایینی یێن وێ پارێزگەهێ دا هەی. هەروەسا كورتییەك ژ دیرۆكا بزاڤا ڕزگاریخوازییا كوردستانێ بۆ بەرهەڤبوویان باس كر و دوپاتی ل سەر برایەتی و تەبایی و پێكڤەژیانا د ناڤبەرا پێكهاتەیێن جودا یێن ئیراقێ دا كرەڤە و ئەو چەندە ژی ڕاگەهاند كو سوپاس بۆ خودێ ڕژێمێن بەری نوكە یێن ئیراقێ نەشیاینە نەخوەشییێن سیاسی یێن گەلێ كوردستانێ لگەل حوكمەتان بكەنە نەخۆشی د ناڤبەرا گەلێن ئیراقێ دا.
هەڤدەم د پشكەكا دی یا ئاخفتنێن خوە دا سەرۆك بارزانی ڕۆناهی ئێخستە سەر ئیراقا پشتی 2003 و دووپات كر كو دەستوورێ ئیراقێ نەخشەڕێیەكێ گونجایە بۆ چارەسەركرنا هەموو وان كێشە و گرفتێن هەین.
د پشكەكا دی یا كۆمبوونێ دا بەرهەڤبوویان دەربارەی ڕەوشا سیاسی و ئەمنی و ئیدارییا دەڤەرێن خوە، پرسیار و تێبینییێن خوە ئاراستەی سەرۆك بارزانی كرن و سەرۆك بارزانی بەرسڤ و بەرچاڤڕوهنییێن پێدڤی بۆ بەرهەڤبوویان بەرچاڤكرن.
