پەیڤدارێ دەستەیا گەشتوگوزارێ: ئەم كار دكەین گەشتیار هەرچار وەرزان بهێنە هەرێما كوردستانێ
هەولێر، قائید میرۆ:
پەیڤدارێ دەستەیا گشتیا گەشتوگوزارێ ل هەرێما كوردستانێ ئاشكرا كر، ژێرخانەیا كەرتێ گەشتوگوزارێ هاتیە بهێزكرن و دبێژیت: د دەمێ نوكە دا هەرێما كوردستانێ شیان هەنە هەر شەڤ پێشوازیێ ل حەواندنا 100 هزار گەشتیاران بكەت، سالێن بۆری ژ بەر نەبوونا جهێ حەواندنێ گەشتیار ل ناڤا پاركان دمان.
ئیبراهیم عەبدولمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیاركر، ستراتیژیەتا حوكمەتا هەرێما كوردستانێ ئەوە كار لسەر بهێزكرنا ژێرخانەیا كەرتێ گەشتوگوزارێ بكەت و پڕۆژە بهێنە زێدەكرن، ئەو ژی ب رێیا ناساندنا هەرێما كوردستانێ وەكو جهەكێ گەشتیاری ل دەڤەرێ و زێدەتر ئەنجامدانا چالاكیێن گەشتیاری و گۆت: «د دەمێ نوكە دا بۆ وەرزێ هاڤینێ مە وەكو دەستە، هەماهەنگی ل گەل لایەنێن پەیوەندیدار هەیە، مینا: ئاسایشا زالگەهان و كۆمپانیێن گەشتیاری بۆ هاتنا گەشتیارێن وەرزێ هاڤینێ».
ئیبراهیم عەبدولمەجید گۆت ژی: «سالێن بۆری د دەمێ بێهنڤەدانێ دا، هندەك جاران ژ بەر نەبوونا جهێن حەواندنێ گەشتیار نەچار دبوون د ناڤا پاركا دا بمینن، بەلێ نوكە ئەم گەهشتینە قووناغەكێ، كو د شیان دایە هەر شەڤ 100 هزار گەشتیار بمینن و جهێ وان هەیە، هەروەسا كەرتێ گەشتیاری ب تنێ ئێك وەرز نەمینیت، بەروڤاژی ئەم یێ كار دكەین گەشتیار هەرچار وەرزان بهێنە هەرێما كوردستانێ».
