نڤیسینگەها پەڕلەمانـێ ئیراقـێ ل ئاكرێ دێ هێتە ڤەكرن
رەمەزان زەكەریا:
ب بزاڤێن بەردەوام یێن هەردو پەڕلەمانتاران د. زیرەك زێباری و سەلوان تەها، ئەندامێن فراكسیۆنا پارتی، سەرۆكاتیا جڤاتا نوونەرێن ئیراقێ ب فەرمی ڕازیبوون ل سەر ڤەكرنا نڤیسینگەها جڤاتێ ل ئاكرێ دا.
هەردو پەڕلەمانتاران ب نڤیسارەكا فەرمی داخواز ژ ئەمیندارییا گشتی یا جڤاتا نوونەرێن ئیراقێ كربوو، ب مەرەما ب رێڤەبرنا كاروبارێن وەلاتیان و نێزیككرنا دۆسەیێن دەڤەرێ ب جڤاتێ ڤە، نڤیسینگەهەكا پەڕلەمانی ل ئاكرێ بهێتە ڤەكرن.
ئەمیندارییا گشتی یا جڤاتا نوونەرێن ئیراقێ د بەرسڤەكا فەرمی دا ڕاگەهاند، كو سەرۆكاتیا پەڕلەمانی ب تەمامی ڕازیبوون ل سەر ڤەكرنا وێ نڤیسینگەهێ ل ئاكرێ دایە.
ڤەكرنا نڤیسینگەهێ دێ بیتە پرەكا ڕاستەوخۆ د ناڤبەرا وەلاتیێن ئاكرێ و دەڤەرێن دەوروبەران ل گەل جڤاتا نوونەرێن ئیراقێ، ژ بۆ گەهاندنا داخوازی و ئاڕێشەیێن وان بۆ لایەنێن پەیوەندیدار.
دكتۆر زیرەك زێباری ئەندامێ جڤاتا نونورێن ئیراقێ ل فراكسیۆنا پارتی راگەهاند: ب هیڤینە كو ب رێكا ڤەكرنا نڤیسینگەهێ خزمەتاكا باشتر پێشكێشی ئاكنجیێن دەڤەرێ بكەین.
