بۆ ئاشتییێ دڤێت پرسا کوردی ل تورکیا بهێتە چارەسەرکرن
چاڤدێرێن سیاسی دیار دکەن، کورد هەردەم پشتەڤانیێن ئاشتیێ نە، لێ ژ بۆ ئاشتیێ و ئارامیێ و پێکڤەژیانێ ل تورکیا ژی دڤێت پرسا کوردی بهێتە چارەسەرکرن چونکی هەتا پرسا کوردی ل تورکیا نەهێتە چارەسەرکرن دێ هەردەم ئالۆزی ل تورکیا روو دەن.
ئورهان خەیروللا چاڤدێرێ سیاسی یێ کورد ل ئۆرۆپا دیار کر، بابەت تنێ راگرتنا شەڕی نینە، راستە کورد ل تورکیا هەردەم داخوازا ئاشتیێ کرینە و نها دو سالن شەڕ هاتیە راگرتن و ئاشتی هەیە و رەوش ئارامە، لێ بابەت تنێ راگرتنا شەڕی نینە، هلوەشاندنا پەکەکێ و راگرتنا شەڕێ چەکداری ل تورکیا رامانا هندێ نادەت کو پرسا کوردی هاتیە چارەسەرکرن و گۆت: (دڤێت پشتی ب دووماهی هاتنا شەڕی ل تورکیا دەست ب قووناغەکا نوو بۆ ئاشتیێ و چارەسەرکرنا پرسا کوردی بهێتە کرن، یا نها روو ددەت قووناغا چارەسەرکرنا پرسا کوردی نینە، بەلکو رێککەفتنەکە د ناڤبەرا ئیمرالیێ و دەولەتا تورکیا دا هاتیە کرن بۆ نەمانا پەکەکێ و شەڕێ چەکداری، ئانکۆ ژ بۆ چارەسەرکرنا پرسا کوردی ل تورکیا هەتا نها چ نەهاتیە کرن).
ناڤهاتی ئەو یەک ژی دیارکر، بەرپرسێن تورکیا بخوە ب سالانە دبێژن کو هەتا پرسا کوردی ل تورکیا نەهێتە چارەسەرکرن قەیرانێن دی ژی دێ بەردەوام بن، دەرئێخستنا یاسایا ئاشتیێ و راگرتنا شەڕی روودانێن باش و گرنگن، لێ ئەو یەک رامانا هندێ نادەت پرسا کوردی هاتیە چارەسەرکرن یان ژی کار بۆ چارەسەرکرنا پرسا کوردی دهێتە کرن، چونکی تشتەک وەسا نینە و گۆت: (هەکە مەرەما تورکیا ئاشتی و پێکڤەژیان و برایەتی بیت وی دەمی دڤێت پرسا کوردی ب رێیا دستوورەکێ نوو و دیموکراتی بهێتە چارەسەرکرن، رەنگە پەکەکە و ئیمرالی چو داخوازیێن وەسا بۆ کوردان نەکەن، لێ گەلێ کورد ل تورکیا داخوازا مافێن خوە یێن رەوا دکەت و هەتا کورد ل تورکیا نەگەهنە مافێن خوە یێن رەوا بێگومان دێ ئالۆزیێن هەی بەردەوام بن، ئانکۆ ب کورتی هەکە بەرپرسێن تورکیا داخوازا ئاشتیێ و پێکڤەژیانێ دکەن وی دەمی دڤێت پرسا کوردی ب تەمامی و ب رێیا دستوورەکێ نوو و دیموکراتی چارەسەر بکەن).
ئایدن تەکین چاڤدێرێ سیاسی ژی دیار کر، بێگومان نەمانا شەڕی تشتەک گەلەک باشە، لێ دڤێت هەموو هێز و ئالیێن سیاسی یێن کوردی ل باکورێ کوردستانێ خوە بۆ قووناغەکا نوو بەرهەڤ بکەن، ب تایبەتی ژی ئەو پارتێن کوردی یێن خوە وەکو هێزەکا نەتەوەیی نیشا ددەن دڤێت پێکڤە دەست ب قووناغەکا نوو بکەن، پێدڤیا کوردان ب هێزەکا نەتەوەیی و بهێز ل تورکیا و باکورێ کوردستانێ هەیە، کورد دشێن ب رێیا خەباتا سیاسی و هەلبژارتنان پێگەهێ خوە ل تورکیا بهێز بکەن، هەکە هەموو هێزێن کوردی بەرەیەکێ نەتەوەیی دروست بکەن دشێن د هەلبژارتنان دا پتر ژ ٢٠٪ ژ دەنگێن تورکیا بدەستڤە بینن و وی دەمی دێ شێن کاریگەریەکا گەلەک مەزن ل سیاسەتا تورکیا بکەن.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، کورد ل تورکیا دەست ژ مافێن خوە یێن رەوا بەرنادەن، بێگومان دڤێت رەوشەنبیر و چاڤدێرێن سیاسی یێن کورد ژی هەست ب بەرپرسیاریا خوە یا دیرۆکی بکەن، کوردان د ٥٠ سالێن بۆری دا گەلەک قوربانی داینە و داخوازا ئازادیێ دکەن، بێگومان هەکە خەباتەک نوو ب رێیا سیاسەتێ و دوور ژ شەڕی بهێتە کرن دێ گوهۆڕینێن گەلەک مەزن ل تورکیا روو دەن و گۆت: (کورد دشێن ب رێیا خوەنیشادانان و خەباتا سیاسی و مەدەنی دەستهەلاتا تورکیا نەچار بکەن کو گوهۆڕینان بکەت، دڤێت گوهۆڕینێن سیاسی و قانوونی ل تورکیا بهێنە کرن، دڤێت هەموو مافێن گەلێ کورد ل تورکیا د دستوورەک نوو و دیموکراتی دا بهێنە گەرەنتیکرن، دڤێت ئارمانجا هەموو هێزێن سیاسی ژی گەرەنتیکرنا مافێن رەوا یێن گەلێ کورد بیت، چونکی ئاشکرایە هەتا کورد ل تورکیا نەگەهنە مافێن خوە ئاشتی ژی دروست نابیت).
ل ئالیێ دی گەلەک ژ نڤیسەر، ڤەکۆلەر، چاڤدێرێن سیاسی و کەسایەتیێن کورد ژی د داخویانیێن جودا جودا دا دیار کرن، کوردان هەردەم داخوازا ئاشتیێ و پێکڤەژیانێ کرینە، لێ دەولەتا تورکیا ب سالانە هەبوونا کوردان رەت دکر، لێ نها سەردەمێ ئینکارکرنا کوردان ل تورکیا نەمایە و قووناغەکا نوو دەستپێکریە، هەکە براستی ژی ئارمانجا دەستهەلاتا تورکیا چارەسەرکرنا پرسا کوردی بیت وی دەمی دڤێت ب کریاری هندەک تشت بهێنە کرن، چونکی نابیت ئێدی وەکو وەلاتیێن پلە دو سەرەدەری ل گەل کوردان بهێتە کرن، کورد ب چو رەنگەکێ تشتەک وەسا قەبوول ناکەن، هەکە کورد ژی وەکو تورکان ل تورکیا خوەدان هەمان مافی بن، ئانکۆ د دستوورێ تورکیا دا هەموو مافێن گەلێ کورد بهێتە گەرەنتیکرن وی دەمی نە تنێ پرسا کوردی بەلکو دێ گەلەک پرسێن دی یێن تورکیا ژی هێنە چارەسەرکرن.
ل گۆر باوەریا چاڤدێرێن سیاسی دڤێت ئارمانجا دەستهەلاتێ تنێ مژوولکرنا کوردان نەبیت، چونکی هەکە ب کریاری کار بۆ چارەسەرکرنا پرسا کوردی نەهێتە کرن دێ جارەکا دی ئالۆزیێن مەزن ل تورکیا روو دەن.
