کورد خواندنا ب عەرەبی ل رۆژئاڤایێ کوردستانێ بایکۆت دکەن
دوهی سالا نوو یا خواندنێ ل سووریێ و رۆژئاڤایێ کوردستانێ دەستپێکر و ب هزاران زارۆیێن کورد نەچوونە قۆتابخانێ و خواندن بایکۆت کرن و وەلاتیێن کورد ژی دیار دکەن ب سالانە زارۆیێن وان ب زمانێ کوردی دخوونن و دڤێت خواندن ب زمانێ کوردی بیت.
دوهی ل سووریێ و رۆژئاڤایێ کوردستانێ سالا نوو یا خواندنێ دەستپێکر و پڕانیا قۆتابخانەیێن ل رۆژئاڤایێ کوردستانێ چۆل بوون و زارۆیێن کورد سیستەمێ نوو یێ خواندنێ بایکۆت کرن و نەچوونە هۆلێن خواندنێ و ئەو یەک ژی نها بوویە ئەگەرێ قەیرانەکا مەزن ل رۆژئاڤایێ کوردستانێ.
د ڤێ دەربارێ دا وەلاتیێ ب ناڤێ ئەحمەد ل باژێرێ قامشلۆ یێ رۆژئاڤایێ کوردستانێ دیار کر، یا نها شام ل دژی کوردان دکەت بەردەوامیا سیاسەتا رژێما بەرێ یە، چەندین سالن زارۆیێن وان ب زمانێ کوردی خواندینە و چو ژ زمانێ عەرەبی نزانن و نها حوکمەتا نوو یا شامێ تنێ د حەفتیێ دا سێ وانە ب زمانێ کوردی دیار کرینە و یێن دی دڤێت ب عەرەبی بن و ئەو یەک ژی زۆرداریەکا گەلەک مەزنە، ژ بەر ڤێ یەکێ ژی ئەو ناهێلن زارۆیێن وان بچنە قۆتابخانەیان و دڤێت شام بریارا خوە هلوەشینیت و دڤێت خواندن ل هەموو دەڤەرێن کوردی یێن رۆژئاڤایێ کوردستانێ ب زمانێ کوردی بیت.
ب سەدان مامۆستایێن کورد ژی وەکو نەرازیبوونەک ل دژی بریارا حوکمەتا شامێ نەچوونە هۆلێن خواندنێ و دیار کرن دڤێت سیستەمێ خواندنێ ل رۆژئاڤایێ کوردستانێ وەکو بەرێ بیت و ب زمانێ کوردی بیت، زارۆیێن کورد ل رۆژئاڤایێ کوردستانێ چەندین سالن ب زمانێ کوردی دخوونن و نابیت نها زۆرداری ل زارۆیێن کوردان بهێتە کرن و دڤێت شام رێزێ ل داخوازیێن گەلێ کورد بگریت، هەکە ئەو دبێژن کورد برایێن مە نە وی دەمی نابیت ب زۆرێ زارۆیێن کوردن نەچار بکەن کو ب زمانێ عەرەبی بخوونن، ئەو یەک دێ کاریگەریا خوە یا گەلەک خراب ل سەر سیستەمێ پەروەردێ ل رۆژئاڤایێ کوردستانێ هەبیت.
