پڕۆژەیەكێ ستراتیژی یێ ئاڤێ ل شێخانـێ دێ هێتە بجهئینان
لەزگین جۆقی:
دەڤەردارێ شێخانێ ئاشكرا كر، ب مەرەما چارەسەركرنا ئاڕێشەیا كێمئاڤیێ، پڕۆژەیەكێ ستراتیژی یێ ئاڤێ ل شێخانێ دێ هێتە بجهئینان.
سەردار شێخ یەحیا، دەڤەردارێ شێخانێ بۆ رۆژنامەیا ئەڤرۆ دیار كر، دەست ب قووناغا ئێكێ یا پڕۆژەیێ ستراتیژی یێ ئاڤێ ل دەڤەرداریا شێخانێ هاتیە كرن، كو پڕۆژەیەكێ هەرە گرنگە بۆ سەنتەرێ دەڤەرداریا شێخان و ناوچەداری و كۆمەلگەهـ و گوندێن ب سەرڤە.
دەڤەردارێ شێخانێ گۆت: «وەكو قووناغا ئێكێ دیزاینا پڕۆژەیی هاتییە چێكرن، قووناغا دویێ تەرخانكرنا بودجەیا پێدڤیە و یا سێیێ بجهئینانا پڕۆژەیە، بجهئینانا ڤی پڕۆژەی، ئاڕێشەیا كێمئاڤییێ ل دەڤەرێ دێ چارەسەر كەت و خزمەتا خەلكێ دەڤەرێ كەت».
