شاخێن پەشێمانان
عاصمە فخری
- ئەڤە سالەکا ڕەبەقە هەلگۆرد من ژ باب و برایێ من دخوازت، لێ بۆچی ئەو قەبولناکن؟ ئەو دزانن من بێی ئەوی ژیان نەڤێت، ما بەرمێشکە ئەو کەیفخوەشییا من نەخوازن؟ خۆزی من ئەگەر زانیبان و فامکربان.
میلێن دەمژمێرێ یازدە و یازدە خۆلەك نیشانددەن، بێدەنگییێ دەستێ خوە ب سەر خانیێ مە دا ئینایەخوار هەروەکو کەس تێڤەنەبت، هەرگاڤ هزردکەم بۆچی هێش ئەو ڕازینابن ئەز هەڤژینێ دگەل هەلگۆردی پێکبینم، د ڕاستی دا ئەو کوڕەکێ باشە، و مالا وی ….. دێ مالا وی… ما من چ شۆل ژ مالا وییە، گرنگ ئەو بخوەیە.
ــ هیڤی، کچا من، کا وەرە بەری بنڤی دا بیستەکێ سەحبەتەکێ بکەین.
ــ بەلێ باب هاتم.
ــ هیڤی، کچا من، تو دزانی هێش تو زاڕۆك بووی دەما ژیانێ دەیکا تە ژ مە ستاندی، من تو ب ژاری و ژیری خودانکری و ژبەر تە و برایێ تە چیایی من دوبارە هەڤژینی پێكنەئینا، ئەز ترسیام ئەگەر ئەوا ئەز دئینم نەخۆشییان بگەهینتە هەوە و ئەز دناڤبەرا هەوەدا بمینم و نەخۆشیین هەوە بچاڤ ببینم… من بەختەوەریا تە دڤێت و بزانە بڕیارا دویماهییێ بۆ تە دزڤرت، ب پشتڕاستی ڤە دبێژمە تە تو دگەل وی کەیفخۆش نابی، ئەو نیاسێ منە و ئەز باش دزانم ئەو کییە و چییە و مالا وان چەوانن و ب چ ڕەنگ هزرێ دكەن. ئەو دەھ سالێن ڕەبەق ژ تە مەزنترە، دیتن و تێگەهشتنا هەوە هەردویان بۆ ژیانێ ژ ئەردی تا ئاسمانی جودایە، تو یا خواندەڤای و ئەوی خوە پۆلا ئێکێ نەبریە سەری….، و تو ژی دزانی كا مالا وان دگەل بویکێن خوە دچەوانن، لێ بۆچی هەر ڕازی دبی نزانم! نەبێژە گرنگ ئەوە… گرنگ مالا وی ژییە؛ ئەون دێ بۆ زاڕۆکێن تە بنە داپیر و باپیر و مام و مەت. دەما مرۆڤ د ژییێ سنێلەیێ دا بت نورمالە دلێ مرۆڤی ل بەرانبەری ڕەگەزێ ژ مرۆڤی جودا خوە بقوتت، لێ کارەساتە تو ئەڤینیا سنێلەییێ بکەیە بڕیارەکا هەڤژینیێ. پێکئینانا هەڤژینیێ یان دێ تە ب ملێ ژیانێ ڤە بلند گرێدەت و هەر خوەشییەکا ل دنێ ل ئەردی تا ئاسمانی دێ بینی، یان ژی دێ تە ل بلنداهییا ئاسمانی ژۆردا ل ئەردی دت و دلێ تە ژ مرۆڤان و ژ حەزژێکرنێ و ژیانێ ڕەش کت. دێ د کەڤلێ مرۆڤەکی دابی لێ ژیان ددلێ تە نابت و دێ ل هیڤیا دویماهی چرکێن مرنا خوەبی. گەر دێ ب من کەی ڕازی نەبە، تو هێش گەنجی و ژیان ل پێشی تەیە.
ــ ئو برا چیا تو چ دبێژی؟ تو ژی دگەل بۆچوونا بابۆی؟
ــ ئەرێ، گوهدارییا بابۆی بکە، تو خۆیشکا من یا ئێکانەی، ب دلێ من ژی نینە تو شوی پێ بکەی؛ هەم ژبەر وی و هەم ژی ژبەر مالا وی. ئەو ڕۆژا تو ب جلکێن سپی بۆ هەلگۆردی دبیە بویك ئێدی پاشدا تە چ مال ژبلی مالا وی نینن، تە چ نەخوەشی و ئاریشە ژی هەبن بۆ مە نەئینە و نەبێژە. دێ تەڕمێ تە هێتە د خانیێ مە ڤە بەلێ تو ب ساخی و بەردای ناهێیە تێڤە.
ـــ ئەڤە دوو سال ب سەر هەڤژینیا من و هەلگۆردی دا دەربازبوون، هێدی هێدی هەستپێدکەم ئەوا باب و برایێ من دگۆت ڕاستبوون و ڕاستیێن پێش چاڤ بوون، لێ بۆچی من نەدییتن یان من نەدڤییا ببینم. ڕەگەزێ مە هەست ب تشتێن ڤەشارتی دکەن، لێ تشتێن ئاشکەرا نابینن، یا ڕاستتر ئەوان نەڤێت ببینن.
ــ هەلگۆرد، چ چێبوویە ئەڤە دەمەکە خوە تو نانێڕیە دێمێ من، دوهی تو ژبەر ئەشقا من دمری، ئەڤرۆ خێرە هندە دویرکەفتی؟ تە باوەرنەدکر کەنگی دێ من بینی و تو ژ سەحکرنا دێم و چاڤ و هەمێزا من تێرنەدبووی، نوکە چ چێبوویە ژێ بێزاربووی؟ چەوا چێدبیت ڕۆژەکێ مرۆڤ حەز ژ کەسەکێ بکەت و بۆ بمرت و پشتی دەمەکێ خوە تاقەتا سەحکرنا ناڤچاڤێن وێ نەبت و پەیڤینا دو پەیڤان دگەل نەبت؟
ــ تو دزانی تو گەلەك دئاخڤی، من زەوقێ ڤان ئاخفتنان نینە، بابێ و برایێ تە ڕاست دگۆت دەما گۆتیە من ژ ئەڤێ شۆلێ ڤەبن، هوین ب کێر ئێك ناهێن.
ــ مەزنێن مە ڕاستگۆتییە «یێ گۆهێ خوە نەدت مەزنان دێ لێ هێن شاخێن بزنان»
ــ خودێیۆ، نۆکە ئەز چبکەم؟
ڕێ لبەر من بەرزەیە، نە ئەز دشێم د ئەڤی خانیڤە بژیم و نە ژی من چ مالباب هەیە ڤەگەڕمێ؟ چارەیا دەردێ من چییە؟
د ئەڤی جڤاکی دا، بەردان بۆ ژنێ تاوانە و بۆ زەلامێ نورمالە. ژ نشکانڤە دەنگێ نامەیەکێ ژ پلاتفۆڕمەکا سوشیالێ بۆ ئەکوانتێ من هات.
