چـو رۆژ بـێ خـەم نـاچـن
محەمەد مراد
ئەڤرۆ چو رۆژ بێ خەم ناچن ژ رویدان و قەیرانێن سیاسی و ئابووری خەلك پێڤە گێژ و بێزار بووینە و كەس ب ئارامی و تەنا سەرێ خۆ نادانیتە سەر بالیفكی و بنڤیت هزار و ئێك رویدان و بیرهاتنێن نەخۆش د ناڤ هزر و مێشكێ خەلكی دا دئازرن، یێن ئابووری و سیاسی و قەیران. سەخمەراتی زێدەبوونا خەلكێ، لێ كار تێكرن و هۆكارێن سەرەكی یێن نەئارامییا خەلكی؛ ژ میدیكار و سۆشیال میدیایێ دەست پێ دكەن، هەرچ رویدانێن بچویك رۆژانە ل هەرێمێ و ژدەرڤەی هەرێمێ چێبت، دێ نمایش كەن و بەلاڤ كەن و نیشا خەلكێ دەن، نەجارەكێ هزار جاران دوبارەكەن و بێژن و سۆشیال میدیا هەڤڕكیێ ل سەر بەلاڤكرنا دەنگوباسان كەن كا چ پەیچ یان گرۆپ و مالپەر دێ زویتر بابەتی بەلاڤ كەن بۆ بدەستڤەئینانا چەند لایك و كومێنتان، لێ نزانن كا ئەو رویدان یان بابەت چەند كارتێكرنێ ل گەنج و زارۆك و خێزانێ دكەن ژ هەمی لایەكێ ڤە تایبەتی گەنج ب روودانێن دلئێش یێن ئابووری و سیاسی ڤە دلگران دبن و رەشبین و بێ ئومێد دبن. د باژێر و خێزانێن خۆ دا، هەستێن وان ئالۆز دبن و كارتێكرنێ ل كار و چالاكیێن وان یێن رۆژانە دكەن و دبن ئەگەرێ هندێ بەتالە و بێكاری زۆر ببیت، چنكو هەست ب خۆشیێن ژیانێ ناكەن. وەك ڤێ سەرهاتیێ كابرایەكێ ل گوندی گەلەك خەم دخوارن هەر تشتێ چێببا ل گوندی وێ شەڤێ ژ قەهرا و خەمان دا نەدنڤست رۆژەكێ چ دەنگ و باسێن نەخۆش گوه لێ نەببوون و مەغرەب چو مال د دلێ خۆ دا دگۆت (الحمداللە) ئەڤرۆ من چ گوهل ێ نەبوویە و دێ ب ئارامی رەحت چم مال شیڤێ خۆم و تێر نڤم. چو مال و خێزانا وی شیڤ دانا دەست ب خوارنێ كر، كۆڕێ وی یێ بچویك ب لەز و بەز دەرگەه ڤەكر و گۆت: باب تە گوه لێ بوویە. بابی گۆت: خێرە باب چ چێبوویە؟ گۆت چێلا جیرانا مە یا زای.. گۆلگەكێ بێ كوری یێ ئینای. گۆت: دێ ڤێجا وەرە زادی بخۆ یان بنڤە. ئەرێ هەرێ… كەفت خەمان و هزران و دگۆت: مالێ دێ ڤێجا پا ئەو گۆلك دێ چاوا شێت ژ بەر كەڕمۆز و مێشان بێ كوری ژیت و نەشێت مێشان ژ خۆ برەڤیینت، ما د خەما گۆلكی دا و هەتا سپێدێ خەو ب چاڤان نەكەفت، ژبەر گۆلكێ بێ كوری نەنڤست. ل وی دەمی چ تێلڤزیۆن و تەلەفوون نەبوون، تنێ دەنگ و باسێن گوندی بوون.نوكە تێلڤزیۆن وفەیسبۆك و تیكتۆكێ ڤەكە هزار و ئێك سەرهاتیێتن وەكی گۆلگێ بێ كوری، دێ بینێ دبن ئەگەرێ هندێ كەس ئارام و رەحت نەبیت.
