دەمژمێرەكا بێ مۆبایل
دلسوز تەلحە
د ناڤ مالێن مە یێن ئەڤڕۆ دا، ڕوودانەكا بێدەنگ بەلێ گەلەك مەزن ڕوو ددەت، تەماشە دكەی هەموو ئەندامێن خێزانێ د ئێك ژۆر دا ب پێكڤە د ڕوونشتینە، بەلێ كەسێ ئاگەه ژ كەسێ نینە و هەر ئێك د ناڤ شاشەیا مۆبایلا خۆ دا بەرزە بوویە، ئەڤ چەندە هێدی هێدی ئەو ئاخفتنا گەرم، كەنی و لێك تێگەهشتنا د ناڤبەر دایك و باب و زاڕۆكان دا كێم دكەت و دیوارەكێ نە دیار د ناڤبەرا مالباتێ دا ئاڤا دكەت.
ژ بۆ پاراستنا پەیوەندیێن خێزانی، دانانا دەمژمێرەكا بێ مۆبایل د ناڤ مالێ دا بوویە پێدڤییەكا زۆر گرنگ، مەرەم ژ ڤێ چەندێ ئەوە كو خێزان ڕۆژانە بتنێ ئێك دەمژمێر ل دەمێ ئێڤارییان، بانژی ب شەڤ هەموو ئامێرەێن تەكنۆلۆژیایێ بدەنە لایەكی و وی دەمی تەرخان بكەن بۆ دانوستاندنێ دناڤبەرا هەموو ئەندامێن خێزانێ دا و پێكڤە باخڤن كا ڕەوشا وان چەوایە و مالا وان پێدڤی ب چ هەیە و هوكە كێماسیەك هەبیت دێ چەوا شێن پێكڤە چارەكەن و ئەڤ دەمژمێرە دبیتە دەرفەتەكا زێڕین دا كو دایك و باب ب ئارامی گۆهدارییا ئاریشە و پێدڤی و خەونێن زاڕۆكێن خۆ بكەن، زاڕۆك ژی هەست ب گرنگی و گەرمیا مالێ بكەن.
دەستپێكرنا ڤێ پێنگاڤێ یا ب ساناهی یە و پێدڤی ب بڕیارەكا بەرهەڤ یا دایك و بابان هەیە، د ڤێ دەمژمێرێ دا، خێزان دشێت ب پێكڤە شریناهیەكی یان فێقیەكی یان هەر تشتەكێ دی بیت پێكڤە بخون، یاریێن جڤاكی یێن سادە بكەت یان بەحسێ سەربۆڕێن ڕۆژانە بكەت، كانێ زاڕۆك دبینیت دایك و باب مۆبایلا خۆ ددانن دا كو گوه ل ئاخفتنا وی بگرن، باوەریا وی ب خۆ و ب مالا خۆ گەلەك بهێزتر دبیت و حەزا وی بۆ شاشەیێن سار كێمتر دبیت.
تەكنۆلۆژیا دشێت كارێن مە ب ساناهی بكەت، بەلێ چو جاران ناكەڤیتە جهێ حەز و خۆشیا خێزانی، پاراستنا لێكتێگەهشتنێ پێدڤی ب دەمێ ڕاست هەیە، دانانا دەمژمێرا بێ مۆبایل وەرگرتنا دەلیڤەكا بچووكە بۆ ڕاگرتنا ئارامی، ساخلەمییا دەروونی و ئێكگرتنا مالێ د بەرامبەر زەبرا دیجیتالی دا.
