ل 25ێ ئیلۆنێ گەلێ كوردستانێ بڕیار ل سەر پاشەڕۆژا خـۆ دا
مەكتەبا رێكخستنا پارتی ل بەهدینان ب هەلكەفتا 25ی ئیلۆنێ، نەهەمین سالڤەگەڕا ڕیفراندۆما سەربخۆییا كوردستانێ پەیامەك بەلاڤكر و تێدا هاتیە: د ڤێ رۆژێ دا گەلێ كوردستانێ ب شێوەیەكێ شارستانی، دیموكراتی و ئاشتیانە دەربڕین ژ ئیرادەیا خۆ یا ئازاد كر و بڕیار ل سەر پاشەڕۆژا خۆ یا سیاسی دا.
مەكتەبا رێكخستنێ د پەیاما خۆ دا ئاشكرا ژی كریە كو مافێ گەلان د دەستنیشانكرنا چارەنڤیسێ خۆ دا، نە بتنێ درووشمەكێ سیاسی یە، بەلكو پرەنسیپەكێ جێگیر و دانپێدایە، د یاسا نێڤدەولەتی و پەیماننامەیێن مافێن مرۆڤی دا. كارنامەیا نەتەوەیێن ئێكگرتی و پەیماننامەیێن نێڤدەولەتی یێن مافێن مەدەنی و سیاسی، ب ئاشكرا دوپاتیێ ل سەر ڤی پرەنسیپی و ڤی مافێ ڕەوا بۆ هەموو گەلان دكەن.
د پەیاما مەكتەبا رێكخستنێ دا هاتیە: «ئەم ب شانازی ڤە ڤێ ڕوودانا مێژوویی ب بیردئینین، د هەمان دەم دا، و پێخەمەت ئاڤاكرنا پرێن باوەریێ د ناڤبەرا هەموو پێكهاتەیان دا و مسۆگەركرنا پەشەڕۆژەكا گەش بۆ گەلێ ئیراقێ و گەلێ كوردستانێ و دوبارەنەكرنا خەلەتیێن بۆری، ئەم دوپاتیێ ل سەر گرنگیا پێشئێخستنا زمانێ دیالۆگ و تێكگەهشتنێ دكەینن بۆ چارەسەركرنا تەڤایا ئاڕێشەیێن هەلاویستی، ل گۆرەی میكانزمێن دەستووری دیاركرین».
دیسا تێدا هاتیە: «د ڤێ ڕۆژا مێژوویی دا، سەرێ ڕێزێ بۆ شەهیدێن ڕیفراندۆمێ و تەڤایا شەهیدێن ڕێكا ئازادییا كوردستانێ دچەمینین، سۆز و پەیمانان بۆ سەرۆك بارزانی نوو دكەین، كو هەردەم د سەنگەرێن پێشیێ دا بین، بۆ پاراستنا مافێن ڕەوا و قەوارەیێ دەستووری یێ هەرێما كوردستانێ، سلاڤ ل ئێكڕیزی و ئێكدەنگیا گەلێ كوردستانێ، سلاڤ ل ئەندازیار و نەخشەسازێ ڕیفراندۆمێ، سەرۆك مەسعود بارزانی، سلاڤ ل خۆڕاگریا پێشمەرگەیێن قەهرەمان».
