چ نەفرەتەکا بەلاڤە
رزگارێ صالحی
د ناڤ دەستێن من دا،
نەفرەتەك هەلگرتییە،
نەفرەتا ژ دەستدانا هەمی تشتان،
ئەوێن ئەز دبێژم: «یێ من».
مرۆڤ، جهـ، بیرهاتن،
ب شێوەیەکێ پاییزی
هەمی ئەوا ئەز نێزیکی دلێ خو دکەم
رێکەکێ، قۆلاچەکێ دبینیت،
داکو تێدا ب «وەریێت».
ژبەر هندێ
نوکە ئەز ژ دەستدانا مرۆڤان ناتڕسم،
ئەز ژ هوگربوون و پێڤەگرێدانێ دتڕسم،
چونکی ب ڤان دەستان من دیتییە!
کا ژیان چەند زووی «یا من» دکەتە «ڕۆژەکێ هەبووی».
