سەد پەلاتینک بێی ژێگرتن…
هەلبەست: لوقمان مەحمود*
وەرگێڕان: عارف حیتۆ
مادەم ل بەرانبەری من چ نینە
کو ژ دەستبدەم
چ جارا ل دۆر خوە نازڤڕم.
*
ل وێ ڕۆژا مە ڤیای
ببین فریشتە
کەسەک ژ مە ڕزگار نەبوو.
*
د جەنگێن نوودا
خوە بکوژ ژی،
وەک کوشتییەکی خویا دبیت.
*
کەو دفڕن
چیا ژی د دویڤدا دفڕن
وەیە، کەسەک ژ بلی کوردان
د ڤێ ئێشانێ ناگەهیت!
*
ئەوا نەشێین ژبیربکەین
دنڤیسین
*
ل جهێ مری
هەمی تشتەک
مینا قەفەسکێ خویا دکەت.
*
چەند یا خوەشە ئەڤ چاڤەڕێبوونە،
هەردەم شیانا ژیانێ
دپەژرینیت.
*
پیچەک فشارێ تێرا دکەت
کو تێبگەهی
پەیڤن یێن کەفتینە خەفکێ.
*
هەردەمەکێ من ئێک ئەڤاند
ئەز دناڤ دلێ مندا کوشتم.
*
چ بەڵگەیەک
ژبۆ هەبوونا وەلاتێ من نینە
گۆڕێ دایکا من تێ نەبیت!
*
مە نەڤێت بفڕین
لێ مە دڤێت هەست پێ بکەین
کو مە ژی چەنگ هەنە.
*
ژ بلی چوونێ
چ ڕێکێن دی ل بەر مە نینن
لێ ئەم ناچینە چ جهان.
*
ئەوێن هێشتا خەونان
ب ژیانەکا دیڤە دبینن
خەونێن وان ژێ زوها بوون و مرن…!
*
د هەمی سەردەماندا
شعر یا کێمە و شاعر گەلەکن.
*
شادییا ڕۆناهیێ د تاریێدا
مینا ئاگرەکێ زەبەللاحە!
سەد پەلاتینکێن بێ ژێگرتن
خوە کوشتن.
*
ل وێ ڕێکا درێژا بەر ب مالڤە
بێدەنگی، ژ هەمی تشتان
ب ترسترە.
*
بەری بڤران،
دارڤان جوامێرەک بوو
چ ژ ڕامانا کوشتنێ نەدزانی.
*
ئەز نەهاتیمە گوهارتن،
تنێ خەمێن منن هاتینە گوهارتن
ژ ڕەش و سپی، ڕەنگاوڕەنگ بووینە…
*
برین، مالەکا نوویە
ژبۆ ژیانەکا کەڤن.
*
دوستۆ؛ هەر چ یا تو دبینی
ئەو ژی تە دبینیت
ئەڤینی ل ڤێرەیە، تو نابینی.
*
سەیرترین ڕاستی
ئەوە کو شاعر، تنێ شاعر
ل گۆڕستانان هەڵپەرستن.
*
د دلێ دارستانێدا
کەربوکینەکا ڤەشار هەیە
بڤرە.
*
کوردێن هەنێ،
ئەم نەشێین بێژین بەختەوەرن
یان دلشادن،
لێ فەرە ب ئەڤینییەکا پتر وان باخێڤین…
*
یێ هزرێ د ژنەکێدا دکەم
کو وەک ڕزگاربوونەکا سەختە
پێ ڤەژیم.
*
ب پەیڤێ.. ئەز جیهانێ هەمیێ دبینم
هەر ب پەیڤێ، خوە ژی دبینم.
*
ئەو پەلاتینکا دلێ خوە دنقینیت
وەک وێ گولێیە
یا ژ نشکەکێڤە دزانیت دژمنێن هەین.
***
* لقمان محمود: شاعر و ڕەخنەگرەکێ کوردێ ڕۆژئاڤایە (سوریا) و نهۆ ل وەلاتێ سوێدێ دژیت، ئەندامێ ئێکەتییا نڤیسەرێن سوێدی و ئەندامێ پەنا کوردە، نێزیکی ٢٨ کتێبێن چاپکری یێن ڕەخنەیی و شعرێ هەنە.
ژێدەر: لقمان محمود (2024). مئە فراشە لا علی التعیین، شعر. من منشورات (49 books)، گ1، السوید.
