ئیرانێ ب سەدان کەس ل سێدارەیێ داینە کو پڕانیا وان کوردن
رێکخستنا مافێن مرۆڤی یا رۆژهەلاتێ کوردستانێ دیار دکەت ئەڤسالە ئیرانێ نێزیکی ٧٠٠ کەس ل سێدارە داینە کو پڕانیا وان کوردن و ب هزاران کەس ژ وەلاتێن کورد و بەلوچ ژی هاتینە دەستەسەر کرن و رەوشا مافێن مرۆڤی ل ئیرانێ گەلەک خرابە.
ئەندامەکێ دەستەیا رێڤەبەر یا رێکخستنا مافێن مرۆڤی دیار کر، د گەل دەستپێکا شەڕێ ئیرانێ ل گەل ئەمریکا و ئسرائیلێ دا رەوشا مافێن مرۆڤی ل ئیرانێ گەلەک خراب بوویە، ب هزاران کەس ل ئالیێ هێزێن ئێمناهیێ یێن ئیرانێ ڤە هاتینە دەستەسەرکرن کو پڕانیا وان کورد و بەلوچن، هەروەسا ئەڤسالە ئانکۆ ل سالا ٢٠٢٦ ئیرانێ نێزیکی ٧٠٠ گرتیێن سیاسی ل سێدارە داینە کو پڕانیا وان ژی دیسان هەر کورد و بەلوچن و ئەو یەک ژی نیشا ددەت کو فشارەکا گەلەک زێدە ل سەر کوردان و بەلوچان ل ئیرانێ هەیە.
هەمان بەرپرسی کو نەخواستیە ناڤێ وی بهێتە ئاشکرا کرن ئەو یەک ژی دیار کریە، پشتی راگرتنا شەڕی ئیرانێ پتر ژ سێسەد گرتیان ل سێدارە داینە و هەروەسا ب هزاران کەس ژی هاتینە گرتن و نها ژی بەردەوام چالاکڤان و کەسێن رەوشەنبیر دهێنە دەستەسەر کرن و سزایێن گەلەک گران ژی ل سەر وان دهێتە سەپاندن، ئەو یەک ژی نیشا ددەت کو دەستهەلاتا نها یا ئیرانێ گەلەک دترسیت.
ئەندامێ دەستەیا رێکخستنا مافێن مرۆڤی یا رۆژهەلاتێ کوردستانێ ئاماژە ب ڤێ یەکێ ژی کریە کو د دەستپێکا ڤێ مەهێ دا هەتا نها ئیرانێ ٦٨ گرتی ل سێدارە داینە و هەری دووماهیێ ل زیندانا مەشهەدێ دو گرتیێن کو بەری نها پشکداری د خوەنیشادانان دا کربوون هاتینە سزا دان و کەسوکارێن وان ژی هەتا نها نەشیاینە کو تەرمێ وان وەربگرن، رەوشەکا گەلەک خراب ل ئیرانێ هەیە و نها رەوشا مافێن مرۆڤی ل ئیرانێ و رۆژهەلاتێ کوردستانێ گەلەک خرابە، لێ مخابن ژ بەر شەڕی و ناکۆکیێن هەی کەس بەحسێ رەوشا خراب یا مافێن مرۆڤی ل ئیرانێ و رۆژهەلاتێ کوردستانێ ناکەت.
ئەو یەک د دەمەکێ دایە کو بەری چەند رۆژان بەرپرسەکێ سازیا دادوەریێ ل ئیرانێ ژی دیار کر، هەر کەسەکێ پشکداریێ د خوەنیشادانێن ل دژی ئیرانێ دا کربیت دێ ب توندی هێتە سزادان و ژ ئەڤرۆ پێڤە ژی هەر کەس دژبەریا دەستهەلاتا ئیرانێ بکەت دێ وەکو دوژمن سەرەدەریێ د گەل دا هێتەکرن، چونکی دوژمنێن ئیرانێ ب هەموو رێیان یێ کار دکەن دا ئیرانێ لاواز بکەن و ل هەمبەر دوژمنان دا ئیران دێ ب هەموو رەنگەکێ خوە پارێزیت.
