بۆ ئێكەم جارە ل ئیراقێ سكرەكێ مەزن د ناڤ پاركەكێ دا دهێتە چێكرن
هەرهین محەمەد:
پرۆژەیێ پاركا ئالۆكا ئێك ژ مەزنترین و گرنگترین پڕۆژەیێن گەشتیاری و ژینگەیی یە ل پارێزگەها دهۆكێ. ئەڤ پرۆژەیە نەك ب تنێ دێ سیمایەكێ گەش و شارستانی دەتە باژێڕی، بەڵكو دێ بێتە كارتەكا بەرهەمدار بۆ ڕاكێشانا گەشتیاران و بلندكرنا ڕێژا كەسكاتیێ د ناڤچەكێ دا.
شێروان حەسەن، پەیڤدارێ سەرۆكاتیا باژێڕڤانیا دهۆكێ گۆت: پرۆژەیێ پاركا ئالۆكا دێ بیتە وەرچەرخانەكا مەزن د كەرتی گەشتیاری و ژینگەیی دا ل پارێزگەها دهۆكێ و سەرەڕای ئاستەنگێن یاسایی و زێدەگاڤییان، كار د پرۆژەی دا بەردەوامە و ب بڕێڤەچوونا كاران دێ ڕوویەكێ نووی و گەش دەتە دەڤەرێ و ڕێژا كەسكاتیێ دێ گەهینێتە ئاستەكێ بڵند و نێودەوڵەتی گۆت:ڕووبەرێ پاركا ئالوكا (650) ملیۆن و (١٧٥) هزار مەترێن دووجارەن (650.175.000م2)، كو ب ئێك ژ مەزنترین پاركێن سەر ئاستێ عێراقێ و ناوچێ دهێتە ژمارتن و ڕێژا كەسكاتیێ نزیكی ٧٥٪ هەتا ٨٠٪ ژ ڕووبەرێ گشتییێ پاركێ دێ ب داروبار و كێلگەیێن كەسك پێكهێت و ب جێبەجێكرنا ئەڤێ ڕێژا كەسكاتیێ، ڕێژا گشتی یا كەسكاتیێ ل باژێرێ دهۆكێ دێ زێدە بێت و ژ ١٣٪-١٤٪ بەر ب ١٨٪-٢٠٪ بلند بێت، كو ئەڤە ژی گەلەكا نزیكە ژ ئاستێ ستاندەردێ جیهانی.
ناڤهاتی گۆت ژی: ئەڤ پاركە پێكهاتییە ژ كۆمەلەكا خزمەتگوزاریێن هەمەجۆر كو دێ ژ پاركێن دی یا جودابیت و بۆ ئێكەم جارە ل سەر ئاستێ عێراقێ سكرەك د ناڤ پاركەكا گەشتیاری دا دهێتە دروستكرن كو دێ دیمەنەكێ جوان و سەیرانگەهەكا جوان ل دەوربەرێن خۆ دروست كەت و ئەڤ پرۆژە هەتا نوكە د ناڤبەرا ١٨٪ بۆ 20٪ ب دووماهی هاتیەكو كارێن بڕین، كۆلان، كۆنكریت، و چێكرنا سیاجێ دۆروبەران ب دەستپێكرینە.
شێروانی زێدەتر گۆت: بۆ زێدەكرنا جوانیا شەڤێن پاركێ، نافوڕەیێن مەزن د ناڤ ئاڤێ دا دێ هێنە دانان و جهێن یاریان تایبەت بۆ زاڕۆكان و دیسان دروستكرنا ڕێستۆرانت، مزگەفت، و كیشكێن بازرگانی و پلان هەنە ژ بۆ دروستكرنا هۆتێل و كۆمەڵگەهێن گەشتیاری ل داهاتوودا د ناڤ پاركێ دا ئاڤا هشكەڕۆ و ئاڤێن گران یێن ژ ناڤ باژێڕی دهێن دێ هێنە فلتەركرن و پاقژكرن بەری بچنە ناڤ سكرێ پاركێ دا.
