80٪ ژ كارێن پڕۆژەیێ دوسایدێ باعەدرێ – ئێتیت دووماهی هاتیە
دلۆڤان ئاكرەیی:
سەرۆكێ فەرمانگەها میدیا و زانیاریان ل هەرێما كوردستانێ دیاركر، ل چوارچوڤێ هەوڵێن بەردەوام بۆ بهێزكرن و گەشەپێدانا ژێرخانا رێك و جادەیان ل هەرێما كوردستانێ، كارێن پڕۆژەیێ ستراتیژی یێ دروستكرنا رێكا دووسایدا باعەدرێ – ئیتیت بەردەوامن و هەتا نوكە ٨٠٪ ژ كارێن پڕۆژەی ب سەركەڤتی دیماهی هاتینە و كو درێژیا وێ ٢٦ كیلۆمەترن، ئێكە ژ پڕۆژەیێن مەزن و ستراتیژی یێن حوكمەتا هەرێما كوردستانێ.
جۆتیارعادل، سەرۆكێ فەرمانگەها میدیا و زانیاریان ل هەرێما كوردستانێ بۆ رۆژنامەیا ئەڤرۆ گۆت: ب تەمامكرنا ڤێ جادێ دێ، هەمی رێكا د ناڤبەرا هەولێر و دهۆكێ دا دێ بیتە دووساید؛ ئەڤە ژی دێ بیتە رێخۆشكرن و ئاسانكارییەكا مەزن د هاتنووچوونا وەلاتیان و كێمكرنا ڕوودانێن هاتنووچوونێ و پتر گەشەپێدانا كەرتی بازرگانی و ئابووری ل دەڤەرێ.
سەرۆكێ فەرمانگەها میدیا و زانیاریان ل هەرێمێ ئاشكراكر، قۆناغێن جێبەجێكرنا ڤی پڕۆژەی ژ ٣ قۆناغێن سەرەكی پێك دئێت؛ قۆناغا ئێكێ ٩٥٪ ژ كارێن وێ دیماهیك هاتینە، هەردوو قۆناغا دوویێ و سێیێ ژی د قۆناغا دیماهیێ دانە و رێكا سەرەكی ژ دوو سایدان پێك دئێت كو پانییا هەر سایدەكی نێزیكی ١٣ مەترە، دگەل دروستكرنا ٣٠ كیلۆمەترێن رێكێن خزمەتگوزاری و د پرۆژەی دا ١١ پڕێن بلند و ژێرپڕ ل خۆ دگرت بۆ ئاسانكارییا هاتنووچوونێ ل بڕگەیێن جوداجودا و د پرۆسەیا جێبەجێكرنا وێ دا، ٦ ملیۆن مەتر سێجا كارێن بڕینێ هاتینە كرن، ٦ كیلۆمەتر دیوارێن پاڵپشت و ٤٥ هزار تەن شیش و ١٠٠ ئاڤرێژ بۆ كۆمكرن و ڕێڤەبرنا ئاڤا بارانێ هاتینە دروستكرن.
زێدەتر گۆت: ب مەرەما ئەنجامدانا كاران ب بلندترین ئاستێ كوالێتییێ، پڕۆژەی پشتا خۆ ب شیانێن خۆمالی گرێدایە؛ پتر ژ ٢ هزار كرێكار و ئەندازیارێن خۆمالی دگەل ١,٥٠٠ ئامێرێن مەزن و ٦ كارگەیێن كۆنكرێتی، ب شەڤ و ڕۆژ د كاركرنا بەردەوام دا نە، دا كو د دەمێ دیاریكری دا ب دوماهیك بێت.
حوكمەتا هەرێما كوردستانێ دووپاتیێ ل سەر وێ چەندێ دكەت كو دێ بەردەوام بیت ل سەر جێبەجێكرنا پڕۆژەیێن ستراتیژی یێن وەكی ڤی بۆ خزمەتكرنا پتر یا وەلاتیان و بهێزكرنا ژێرخانا ئابوورییا كوردستانێ.
