ڕاهاتم
بەهزاد بەهرام
ژ ئەڤرۆ پێڤە
چ چكلێت و چ شكۆلاتان
دگەل قەهوێ
ناخۆم…
چ مێویژ و چ قەسپان
چ شەكرا هویر و پرتپرت
دگەل چایێ
نە تێكەل دكەم
نە دگەل دخۆم..
ژ ئەڤرۆ پێڤە
بۆ گەشت و پیاسان
دگەل سیتاڤكا خوە هەڤرێمە
جار ئەز ل پێشم و
ئەو ل پاش
جار ئەو ل پێشە و
ئەز ل پاش
جارنا ئەم هەردوك
ل سەر ئێك ڕاستەهێلین..
ژ ئەڤرۆ پێڤە
بۆ هەر
شەڕەدەڤ و قەرقەشێ
یان هەڤدیتن و هەڤپەیڤینێ
ئەز ب خوە، دگەل خوە ب تنێ مە
پرسیاران ژ خوە دكەم و
هەر ئەز ب خوە بەرسڤان ددەم
گازندە و ڕەخنەیان ژ خوە دكەم و
ژ خوە دلمایی و تووڕەمە..
جارنا ژی پەسنا خوە دكەم و
دگەل خوە دلخوەش و ب گڕنژینم
بەلێ تاكو نها نزانم
كا ئەز پڕبێژەكێ ڕەهوانم
یان ژی گوهدارەكێ ئارامم!
