ئەز نەشێم
شەهرەزاد نایف
ئەز نەشێم
ل وارەکێ پڕ ژان بژیم
و هەر نەشێم ژێ باربکەم
ئەز هەر نەشێم
ژ بایەپاییزا هەمبێز کریم
خۆ زیز بکەم
ئەز نەشێم
ل زڤستانا..
ب بارانێن تە..
خۆ شل نەکم، ب پەرمیچکێن
بەفرا تە یاریان نەکەم..
ئەز نەشێم
ل بهارێن غەریبیێ
بیرییا نێرگز و شلێرێن
تە نەکەم..
لێ ئەز نەشێم ل وارەکێ
پڕژان بژیم
نە ژی دشێم ژێ بار بکەم
چما سوبە زوی
ل سحارێن خۆ
ب کێلیا شەدایێ نەگڕنژم
یان ژی چیڕۆکێن باب وکالان
و کانیکا سەیدێ
و ئاوازێ پۆر وعەبدالێن
چەمکێ گوندێ شێخ هەسن
گوهـ لێ نەبم
نەشێم ژ تە دویر بکەڤم
نەژی دشێم د گەل تە دا بم
یا دودلم
یا بەرزەمە
ل ڤێرە جوانی هەست..
ڤیان وئێش و ژان
ژ ئێکو دو جودا نابن
و ل وێرێ غەریبی دەردەسەری..
تەنایی وئارامی ژێکڤەنابن
و مەزنترین خۆزیا من
ببیتە نەمانا ناسنامەیا من
کوردستانا من
هەی وەلاتۆ..
هەتا کەنگی
دێ هۆ مینین
نە مرن و نەژین
من یا زانی تەنەڤێت
گۆڕی تەببم
بەلکو تەدڤێت
بۆ تە بژیم
دا د ئەشقا
ئاخ و ئاڤ و بێهنا
تە دا
مریدەک بم..
لێ
هەمی رێکێ دبنە گرێ
من و تە ژئێک ددزن
دەرگەهێ دلی و مێشکێ من دگرن
دا كۆرە بم د رێیا تە دا
و بەرزە ببم.
