بایرام بۆزیەل: دڤێت سیستەمێ تورکیا ببیتە فیدرالی
بایرام بۆزیەل سەرۆکێ گشتی یێ پارتا سوسیالیست یا کوردستانێ ل باکورێ کوردستانێ دیار کر، سیستەمێ نها یێ تورکیا ل هەمبەر چارەسەرکرنا پرسا کوردی بوویە ئاستەنگ، ژ بەر هندێ دڤێت سیستەمێ تورکیا بهێتە گوهۆڕین و ببیتە سیستەمەک فیدرالی.
ناڤهاتی د بەردەوامیا ئاخڤتنا خوە دا ئەو یەک ژی دیار کر، پرسا کوردی چو پەیوەندیا خوە ب تیرۆرێ و شەڕی و توندوتیژیێ ڤە نینە، بابەت مافێن رەوا یێن گەلێ کوردە، ب سالانە تورکیا هەبوونا کوردان ئینکار دکەت و هەتا نها ژی پرسا کوردی نەهاتیە چارەسەرکرن و ژ بۆ چارەسەرکرنا پرسا کوردی دڤێت سیستەمێ تورکیا ببیتە فیدرالی و کورد ژی بگەهنە مافێن خوە، ژ بەر ڤێ یەکێ ژی بەری هەر تشتەکێ دڤێت دستوورێ نها یێ تورکیا بهێتە گوهۆڕین.
سەرۆکێ گشتی یێ پارتا سوسیالیست یا کوردستانێ ئەو یەک ژی نەڤەشارت کو، دەست بەردانا چەکی ژ ئالیێ پەکەکێ ڤە بۆ چارەسەرکرنا پرسا کوردی پێنگاڤەک گەلەک باشە، لێ ژ بۆ چارەسەرکرنا پرسا کوردی دڤێت گەلەک تشتێن دی یێن مەزن بهێنە کرن.
