مەترسی ل سەر بەرهەمێ چاندنێ نەمایە
هەولێر، قائید میرۆ:
رێڤەبەرا گشتی یا پلاندانانێ ل وەزارەتا چاندنێ دیاركر، ل گورەی پێشبینیان ئەڤ سالە ژی دێ رێژەیەكا باش یا بارانێ باریت و دبێژیت: هێشتا كاریگەریا بارانێن سالا بۆری ماینە.
دكتۆر زێدا محەمەد، رێڤەبەرا گشتی یا پلاندانانێ ل وەزارەتا چاندنێ بۆ رۆژناما ئەڤرۆ دیاركر، سالا بۆری رێژەیەكا زۆرا باران و بەفرێ ل هەرێما كوردستانێ باری بوو و مەترسیێن هشكەسالیێ نەهێلان، چونكی ب ئەگەرێ وان پڕۆژەیێن حوكمەتا هەرێما كوردستانێ یێن چێكرنا بەنداڤ و پۆندێن ئاڤێ رێژەیەكا زۆرا ئاڤێ هاتیە عمباركرن و كاریگەری لسەر بلندكرنا ئاستێ ئاڤا بن ئەردی ژی هەبوویە.
دكتۆر زێدا محەمەد گۆت: «ئەم پێشبینی دكەین ئەڤ سالە ژی یا ب بەفر و باران بیت و بەنداڤێن مە تژی ببن، چونكی هندەك بەنداڤان رێژەیەكا زۆر یا ئاڤێ تێدایە و ب چەند بارانێن كێم دێ ئاستێ وان یێ ئاڤێ بلندبیت، هەروەسا بۆ چاندنێ ژی مەترسی نەماینە، هەكە بهێت و بارانێن ئەڤ سالە هەموو د ئێك دەم دا ژی نەبارن».
