یەكەیا شووشتنا گولچیسكان ل نەخۆشخانەیا شۆڕەش – هێتویت هاتە ڤەكرن
ئامێدیێ، مەحمود نهێلی:
ب مەرەما پتر خزمەتكرنا وەلاتیێن سنۆرێ دەڤەرا ئامێدیێ، ب تایبەتی ژی دەڤەرا دەشتا زێی، یەكەیا شووشتنا گولچیسكان ل نەخۆشخانەیا شوڕەش – هێتویت هاتە ڤەكرن.
مەسعود محەمەد تاهر، هاریكارێ رێڤەبەرێ ساخلەمیا دەڤەردارییا ئامێدیێ بۆ رۆژناما ئەڤرۆ دیار كر، ب مەرەما پتر خزمەتكرنا وەلاتیێن سنۆرێ دەڤەرا ئامێدیێ و هەردو ناوچەداریێن دێرەلۆكێ و شێلادزێ، دەرگەهێ یەكەیا شووشتنا گولچیسكان ل نەخۆشخانەیا شۆڕەش – هێتویت هاتە ڤەكرن و ل رۆژێن شەمبی، دوشەمبی و چارشەمبی دێ پێشوازیێ ل نەخۆشان كەت.
ناڤهاتی گۆت: «رۆژانە نەخۆش هەبووینە، پێدڤی ب شووشتنا گولچیسكان بوون و دڤیابا بربانە ئامێدیێ یان ژی دهۆكێ، ژ بەر وێ یەكێ ڤەكرنا ڤێ یەكەیێ گەلەك گرنگیا خوە بۆ دەڤەرێ هەیە».
