فەرمانگەها میدیا و پێزانینان: مووچەخۆرێن هەرێمێ ب ڕێكا (هەژمارا من) زێدەتر ژ 11 ترلیۆن دیناران وەرگرتینە
فەرمانگەها میدیا و پێزانینان ل حوكمەتا هەرێما كوردستانێ د نووترین ڕاپۆرتا خوە دا كو دانەیەك ژێ بۆ (ئەڤرۆ) هنارتییە، ئامارێن نوو یێن پڕۆژەیێ «هژمارا من» بەلاڤ كرن و ڕاگەهاند: تا دەستپێكا مەها چریا ئێكێ 2026 زێدەتر ژ 1,140,000 مووچەخۆر ل پڕۆژەی هاتینە تۆماركرن، كو دبیتە ڕێژەیا 99%ێ ژ سەرجەمێ مووچەخۆرێن هەرێما كوردستانێ.
ب گۆرەی ڕاپۆرتێ، 1,070,000 مووچەخۆران كارتێن بانكی وەرگرتینە. ل مووچەیێ مەها ئیلۆنا بۆری ژی 1,020,000 مووچەخۆران كو دبیتە ڕێژەیا90%ێ مووچەخۆران، مووچەیێ خوە ب ڕێكا ئامیرێن ATM وەرگرتییە.
ژ ئالیێ دارایی ڤە، تا نوكە زێدەتر ژ 11 ترلیۆن دیناران ب ڕێكا پڕۆژەی چووینە سەر هەژمارێن بانكی یێن مووچەخۆران. ژ ڤێ گۆژمەی ژی 62 ملیار دینار وەك پاشكەفت ل ناڤ هەژماران دا مایە.
سەبارەت بەلاڤكرنا مووچەخۆران ب گۆرەی پارێزگەهان، ڕاپۆرتا فەرمانگەها ناڤبری ئاماژە كریە كو پارێزگەها هەولێرێ ل پلەیا ئێكێیە ب 422,130 كەسان، پاشی سلێمانی ب 372,194 كەسان، دهۆك ب 196,741 كەسان و هەلەبجە ژی 25,225 كەسان.
ل دۆر بەلاڤكرنا مووچەخۆران ب گۆرەی جۆری مفاداران، د ڕاپۆرتێ دا هاتییە: فەرمانبەرێن مەدەنی 398,293 كەسن كو زۆرترینن، پاشی خانەنشین ب 313,844 كەس، هێزێن سەربازی ب 237,763 كەس و بنەمالێن شەهیدان ژی 66,390 كەسن.
فەرمانگەهێ دیار كر: نوكە نێزیكی 800 ئامێرێن ATM ل 200 جهێن جودا هاتینە دانان، و ئارمانج ئەوە هەژمارە بۆ هزار ئامێران بهێتە بلندكرن.
فەرمانگەها میدیا و پێزانینان دیاركر كو حەفت بانك ل پڕۆژەیێ (هەژمارا من) پشكدارن ئەوژی هەر ئێك ژ ئارتی بانك ب 205 ئامێران، بانكا جیهان 177 ب ئامێران، بانكا نیشتمانی یا ئیراقێ ب 158 ئامێران، بانكا ئیسلامی یا ئیراقی ب 121 ئامێران، بانكا بەغداد ب 30 ئامێران، بانكا بازرگانی یا ئیراقی ب 21 ئامێران و بانكا BBAC ژی 6 ئامێر هەنە.
هەروەسا هاتیە ڕاگەهاندن كو ل نێزیك مووچەخۆر دشێت ل دووڤ خواستا خوە بانكا خوە بگوهۆڕیت، و كرێیا ڕاكێشانا پارەی ژ بانكەكا دی تەنی چار هزار دینارن. بۆ هەر ئاریشەیەكێ ژی مووچەخۆر دشێت ڕێكا ئەپلیكەیشنا بانكا خوە كارتا خوە ڕاگریت یان پەیوەندیێ ب هێلا گەرم 1991 بكەت.
پڕۆژەیێ «هەژمارا من» ل دووماهییا مەها شواتا 2023 ژ ئالیێ مەسرور بارزانی، سەرۆكێ حوكمەتا هەرێما كوردستانێ ڤە هاتبوو ڕاگەهاندن. ئارمانجا سەرەكی یا پڕۆژەی گوهۆڕینا سیستەمێ ئابۆری یێ هەرێمێ یە ژ مامەلەیا نەختینەیی بۆ سیستەمەكێ دیجیتالی و ب بانكیكرنا مووچەیێن فەرمانبەران. ئەڤ پێنگاڤە هاریكارە بۆ بەهێزكرنا زەلالیێ، كێمكرنا ڕۆتینی و ڕێگرتن ل سپیكرنا پارەی و گەندەلیێ.
