بلندكرنا بهایێ دۆلاری ل پاشەڕۆژێ دێ كارەساتان پەیداكەت
دووڤچوون، قائید میرۆ:
بسپۆرەكێ ئابووری ئاشكراكر، بڕیارا بلندكرنا دۆلاری هەمبەر دراڤێ ئیراقی كارەساتان دێ پەیداكەت و پاشەڕۆژێ دێ مەترسیێن ئەڤێ بڕیارێ دیاربن بۆ وەلاتیێن ئیراقی. هەروەسا دبێژیت، حوكمەتا ئیراقێ ب ئەڤێ بڕیارێ ئاریشەیێن خۆ ل سەر حسابا وەلاتیان چارەسەر كرینە، بەلێ شیاشیەكا زۆر مەزنە حوكمەتەك بۆ چارەسەرێن دەمكی دراڤێ خۆ بێ بها بكەت.
د.ئیدریس كۆچەر مامۆستایێ زانكۆیێ و بسپۆرێ ئابوری بۆ رۆژناما ئەڤرۆ دیارركرر»بێ بهاكرنا دراڤێ نیشتیمانی شاشیەكا زۆر مەزنە، بلندكرنا بهایێ دۆلاری هەمبەر دراڤێ ئیراقی زیانێن زۆر مەزن بۆ سەر وەلاتیێن هەرێما كوردستانێ و ئیراقێ ب گشتی هەیە، زۆر چارەیێن دی هەبوون بۆ تژیكرنا كورت ئینانا بودجەی، بەلێ مخابن سەرۆك وەزیرێن ئیراقێ بڕیارا بلندكرنا بهایێ دۆلاری دەركر، عەلی زەیدی ڤیا چارەسەریەكا بلەز ببینیت بۆ كێماسیێن ناڤا بودجەی ئەو ژی بلندكرنا بهایێ دۆلاری بوو.
زێدەتر گۆت: سەرۆك وەزیرێن ئیراقێ گوتیە ئێك ژ وان مەرەمێن بڕیارێ ئەڤە هەڤسەنگیەكێ دناڤبەرا بهایێ دۆلارێ فەرمی و بازاڕێ راگریت، لێ بلندكرنا بهایێ دۆلاری كاریگەریێن زۆر لسەر بازاڕێ و ژیانا وەلاتیان هەنە و بهایێ كەلوپەلان ب گشتی بەرەف بلندبوونێ یە، چالاكیێن بازاڕی دێ زۆر لاوازبن، ژبەركو بەری نوكە سەد دۆلار ب 132 هزار دیناران ل سەكویا فەرمی ب بازرگانان دهاتەدان، بەلێ نوكە 20 هزار دینار بۆ سەد دۆلاران زێدەبووینە، ئەو ژی زۆرە و دێ وەلاتی قەرەبوویا ئەڤێ زێدەكرنێ دەن، ب تایبەتی بەكاربەر ب بهایەكێ دیاركری، راستە دەستكاریا مووچێ فەرمانبەران نەهاتیەكرن، بەلێ بهایێ كەلوپەلان دێ گرانتر بدەستڤە ئینن، گەلەك جاران شكەستنا حوكمەتێ ب وەلاتیان ناهێتە چارەسەركرن، چو حوكمەت لسەر حسابا خەلكی ئاریشەیان چارەسەر ناكەن.
د.ئیدریس كۆچەر ئاماژەكر «بڕیارا بلندكرنا دۆلاری رەنگە بۆ دەمەكێ كێم هندەك چارەسەریان بكەت، بەلێ دوور یان نێزیك دێ زۆر زیانێن دی پەیداكەت، كارەسات دێ پەیدابن و وەلاتی دێ ڤان مەترسی و كارەساتان بینن، هژمارا وەلاتیێن ئیراقێ سال بۆ سالێ یا بەرەف زێدەبوونێ دچیت و هەر چار سالا جارەكێ زێدەتری 300 پەرلەمانتار یێن دبنە بارگرانی ل سەر داهاتێ نافخۆ، زێدەبوونا مەزاختیان دێ بیتە ئەگەر سال بۆ سالێ بهایێ دۆلاری گرانترببیت، واتە بهایێ نوكە ژی نامینیت و مەترسی هەیە هێشتا دۆلار گرانتر ببیت.
