نابیت بازرگان گرانبوونا بهایێ دۆلاری ب دەلیڤە بزانن بۆ زێدەتر گرانكرنا بهایێ كەلوپەلان
بەرپرسەكێ وەزارەتا بازرگانی ئاشكراكر، بلندكرنا بهایێ دۆلاری كاریگەری لسەر بازاڕی پەیداكرینە و دبێژیت: مە داخواز ژ بازرگانان كریە ئەو كەلوپەلێن د ناڤا عمباران دا ب بهایەكێ گونجایی بفرۆشن.
نەوزاد شێخ كامل، رێڤەبەرێ گشتیێ بازرگانیا هەرێمێ بۆ رۆژناما ئەڤرۆ دیاركر، پشتی بڕیارا بلندكرنا بهایێ دۆلاری كەفتیە د بیاڤێ بجهئینانێ دا، كاریگەری لسەر بازاڕی پەیداكرینە، چونكی پتریا كەلوپەلێن بازاڕی ژ دەرڤە ب دۆلاری دهێنە د ناڤا بازاڕێن هەرێما كوردستانێ دا و گۆت: «لیژنەیێن مە بەردەوام چاڤدێریا بازاڕی و دووڤچوونا بهایێ كەلوپەلان دكەن، بزاڤ دهێنە كرن، بازرگان گرانبوونا دۆلاری ب دەلیڤە نەزانن بۆ زێدەتر گرانكرنا بهایێ كەلوپەلان، ب تایبەتی ئەو كەلوپەلێن بەری بڕیارا گوهۆڕینا بهایێ دۆلاری هاتینە د ناڤا هەرێما كوردستانێ دا».
نەوزاد شیخ كامل گۆت ژی: «مە سەرەدانا بازاڕی كریە و بلندبوون پێڤەدیارە، بەلێ مە داخواز ژ بازرگانان كریە، ئەو كەلوپەلێن د ناڤا عمباران دا ب بهایەكێ گونجایی بدەنە بازاڕی و وەلاتیان، داكو بارگرانی لسەر وەلاتیان پەیدا نەبیت، هەروەسا ئەم بەردەوام چاڤدێریا رەوشێ دكەین و رێكێ ژی نادەین زێدەی بهایێ دیاركری كەلوپەل بهێنە گرانكرن، پێدڤیە رەوشا وەلاتیان ل بەرچاڤ بهێتە وەرگرتن».
