هەژمارەكا جادەیان ل كۆمەلگەها قەدشێ دهێنە چێكرن
ئامێدیێ، مەحمود نهێلی:
د بەردەوامییا گەهاندنا پڕۆژەیێن حزمەتگوزاری دا بۆ دەڤەرێ و چێكرنا رێكێن ناڤخۆیی و رێكێن گوندان و كۆمەلگەهان، سەرۆكاتیا باژێڕڤانیا قەدشێ هەژمارەكا جادەیان ل سەر پێشینەیا تایبەتا خوە ل سنۆرێ باژێرڤانیا ناڤهاتی چێكرن و كەفتنە د خزمەتا خەلكێ وان تاخان دا.
رێڤینگ عادل، سەرۆكێ باژێرڤانیا قەدشێ بۆ رۆژناما ئەڤرۆ دیار كر، ئەو د بەردەوامن ل سەر چێكرنا رێكێن ناڤخۆیی ل سنۆرێ باژێڕڤانیا وان ژ پێخەمەت نەهێلانا كێماسیان و خزمەتكرنا خەلكێ ڤێ كۆمەلگەهێ و گۆت: «هەژمارەكا جادەیان ل سنۆرێ باژێڕڤانیا مە و ل تاخێ رەزا هاتینە قێركرن و چێكرن».
ناڤهاتی دیار ژی كر، پشتی داخوازیا وەلاتیان گەهشتیە بەردەستێ وان، ژ بەر كو پارەیێ پێدڤی د پڕۆژیان دا بۆ چێكرنا وان جادەیان نەهاتیە تەرخانركرن و لەزكرن د چێكرنا ڤان پڕۆژەیان یا پێدڤی بوو، ئەو نەچار بووینە ل سەر پێشینەیا هەیڤانە یا باژێرڤانیێ ڤان جادەیان سەب بكەن و بكەڤنە د خزمەتا خەلكێ ڤێ كۆمەلگەهێ دا.
سەرۆكێ باژێرڤانیا قەدشێ گۆت: «بەری بارانێن ب هێز بهێن و هەری دروست ببیت، ئەم دێ بزاڤێ كەین هەموو ئەو رێكێن پێدڤی چێكەین، هەكە ب تنێ تێكەلە ژی بكەین، ژ بەركو خزمەتكرنا وەلاتیان ل نك مە ژ هەر تشتەكی گرنگترە».