ڕێبـازا شـەهیدان ژ هێڤێنێ مێژوویێ بۆ سـەردەمـەکـێ نـوو یێ خەبـاتێ
عەبدولسەلام شێخ مستەفا
مێژوویا کاروانێ سەرفەرازیێ و قوربانیدانێ، د درێژاهیا خەباتا پارتی دیمۆکراتی کوردستان دا، ب خوین و ئەخلاقێ بەرز هاتیە تۆمارکرن. ئەڤ ڕێبازا سەربلند نە ئەنجامێ پەیمانەکا سیاسی یا لاوازە و نە ژی دەستکەفتەکێ ئاساییە؛ بەلکو بەرهەمێ ڕستەکا درێژ یا قەهرەمانییا هزاران شەهیدان و ماندیبوونا شۆڕشگێڕان ل چیا و دەشتێن کوردستانێیە.
ژبۆ کو ئەڤ کاروانە بها و پیرۆزیا خۆ د ناڤ دلێ مێژوویێ دا بپارێزیت و بگەهینیتە نەڤیێن داهاتی، پێدڤییە ب چاڤەکێ کەرامەت، ڕێزگرتن و هزرکرنەکا کوویر ل ڤێ ڕێبازێ بنێرین.
بۆ وێ چەندێ ئەڤ ڕێبازە وەک مەشخەلەکا ڕووناهی د تاریکییا مێژوویێ دا بمێنێت و بەرەڤ ئاینده‌یەکێ گەش پێنگاڤان باڤێژیت، ئەرکێ مە یێ سەرەکی ئەوە کو ئەم پێداچوونەکا کوویر و ڕەخنەیا ئاڤاکرنێ د ئاستێ خەباتا خۆ دا بکەین.
خەباتا نەتەوەیی پێدڤی ب نووژەنکرنا بەردەوام یا هزری و ڕەوشتی هەیە، دا کو ڕوحیەتا شەهیدان د هەمی قووناغەکێ دا یا ئامادە و زیندوو بیت.
شەهید نیشانێن نەمریێ و تاجەگۆلا کەرامەتا هەر نەتەوەیەکێ نە. ڕێزگرتن ژ خوینا وان تەنێ ب گۆتار، ئاخفتن و درووشمان چێنابێت، بەلکو ب کرداری و وەفادارییا ڕاستەقینە دیار دبت. خزمەتکرنا بەردەوام یا مالباتێن وان یێن سەربلند، نە بەخشیش و منەتە، بەلکو ئەرکەکێ پیرۆزێ ئەخلاقی و نەتەوەییە ل سەر ملێن مە هەمیان.ئاوریدان ل ئێش و ئازارێن وان، ئیرادە و هێزا مە بۆ بەرەڤانی کرنێ بەهێزتر دکەت.
ل سەردەمێ جیهانگەریێ دا، ئەرکێ مە تەنێ پاراستنا ناڤخۆیی نینە. پێدڤییە ئێش، داخواز و چیرۆکێن مێرخاسیا شەهیدێن مە ب بێدەنگی نەمێنن، بەلکو ب زمانێ سەردەمی و میدیایا پێشکەفتی بگەهینینە ئاستێ جیهانی تا تەڤایا جیهانێ ناس بکەت کە ئەڤ گەلە ب چ بها و قوربانیدانەکێ گەهشتییە ڤێ ڕۆژێ.
ئەڤ پەیامە هەم بۆ دۆستان و هەم بۆ دوژمنان یا ئەشکەرایە، کو کاروانێ سەرفەرازی و خەباتا مە یا ئازادیخوازیێ چ جاران ناهێتە ڕاوەستاندن.خوینا شەهیدان و ماندیبوونا مالباتێن وان دێ هەمیشە هەڤێنا ئازادی، سەربەرزیا نەتەوەیی و پاراستنا ئاخ و کەرامەتا کوردستانێ بیت. پرەنسیپێن خەباتا مە وەفادارییەکە کو وەک چیایێن بلندێن کوردستانێ، قاهیم و بنەجهی دێ مینن.