گۆتارا لادەری
عارف رشدی
هێزێن هەلگرێن دید و بۆچوونان بێ بنەما یا (برایەتییا گەلان و جڤاکا دیموکراتیک) وەک گۆتارەکا لادەر، دڤێت ب کێمترین تشت؛ ڕێزێ ل وێ خوینا ڕێتی بگرن کو ژ پێخەمەت سەرفرازییا نەتەویی و نیشتمانی یا گەلێ خۆ ڕێتیین. کو د ڕاستی دا (ل خشتە برن ب درووشمێن تەم و مژاویی)، پاشتر ژی بۆ خواستەکا نەڕەوا د بن ناڤێ پرۆسا (خۆ گونجاندنێ دا!) خەبات و فیداکاریا وان بێ بهاکری. د ڕاستی دا ئەز ب خوە، سیاسەتا وان یا پەیرەوکری ب لادانەکا هەرە مەزن دبینم دژی گۆتارا ڕاستەقینا کوردایەتیێ، و ئەو باس و خواستا وان چو بیرکرن و داهێنان تێدا نینە.چونکو؛
ب درێژاهییا دەهان سالێن داگیرکاریێ؛ گەلێ مە وەک نموونە ل تورکیا و سووریا، ژ ئەگەرێ دانپێدانە نەکرن ب ناسنامەیا نەتەویی و نیشتمانی، تێکەلێ جڤاکا گشتی یا نەتەوێن سەردەست بوون و ب دەهان کەسان پلە و پۆستێن جیاوازێن ئیداری هەبوون، بەلێ (بێ ناسنامە و بێ مافێ خۆ ناسینێ). ژبەر وێ چەندێ ئەو هەرایا پەکەکێ و چەقێن وێ بەرپا کرین، ئاڤە بۆ ئاشا ئینکارکرنێ یە ژ خواستا گەلێ ستەمدیدێ کوردستانێ. بەلێ ژ لایەکێ دی ڤە ئەو ئازادن چاوا سەرەدەریێ دکەن، بۆ گەلێ مە ئەو تشتێ گرنگ ئەوە؛ ئەو تێ بگەهن کو تنێ نوونەرایەتیا بیرکرنەکا بەرتەنگ و دوڤکەفتیێن وان دکەن و پێدڤییە؛
دەستان ژ دەستوەردانان د پرسا نەتەویی یا مە بەر بدەن و سنوورەک بهێتە دانان بۆ شێواندنا خواستا دیارکرنا چارەنڤیسێ سیاسی و یاسایی. ژ بەر کو دید و بۆچوونێن وان د بنەڕەت دا پەیوەندی ب پرسا گەلێ مە ڤە نینە و نەبوویە، بەلکو ئاراستا وان درێژەدانە ب پشتەڤانی و بەردەوامیا سیاسەتا دەولەتێن دابەشکری یێن کوردستانێ و پێشێلکرنا مافێن ڕەوایێن گەلێ مە.