هەرێما كوردستانێ د بەرهەمهئینانا هێكا كورككرنێ دا گەهشتییە ئاستێ پڕكرنا پێدڤیێن ناڤخۆ
رەمەزان زەكەریا
رێڤەبەرێ گشتیێ سامانی ئاژەلی ل وەزارەتا چاندن و ژێدەرێن ئاڤێ ل حكومەتا هەرێما كوردستانێ ڕاگەهاند، كەرتێ پەلەوەریێ ل هەرێما كوردستانێ د چەند سالێن دەربازبووی دا گەشەیەكا بەرچاڤ ب خۆڤە دیتییە و د بەرهەمهئینانا هێكا كوڕككرنێ دا گەهشتینە قۆناغا پڕكرنا تەماما پێدڤیێن ناڤخۆ.
فیراس سەدیق، رێڤەبەرێ گشتیێ سامانی ئاژەلی ل وەزارەتا چاندن و ژێدەرێن ئاڤێ ل حكومەتا هەرێما كوردستانێ گۆت: هەتا سالا 2019 ل هەرێما كوردستانێ تنێ 17 پرۆژەیێن دایكانە هەبوون كو شیانا بەرهەمهئینانا وان سالانە 103 ملیۆن هێك بوون، بەلێ د دەمێ كاركرنا كابینا نەهێ یا حكومەتا هەرێما كوردستانێ دا، هژمارا پرۆژەیان بۆ 27 هاتییە زێدەكرن. هەڤدەم شیانا بەرهەمهئینانا سالانە ژ 103 ملیۆنان بلند بوویە بۆ 220 ملیۆن و 548 هەزار هێكێن كوڕككرنێ. ئەڤە ژی د دەمەكێ دا یە پێدڤیا سالانە یا ناڤخۆیا هەرێما كوردستانێ د ناڤبەرا 190 بۆ 200 ملیۆن هێكان دا یە، ب ڤێ یەكێ ژی ئاستێ بەرهەمهئینانێ ژ خواستا ناڤخۆیی زێدەتر بوویە.
ناڤبری گۆتژی: پرۆژەیێن دایكانە كۆلەكەكا سەرەكی و بناغەیێ پیشەسازیا پەلەوەرانە ل سەرانسەرێ جیهانێ دا، چونكی هێك و چوویچك بۆ پرۆژەیێن پەلەوەرێن گۆشتی دابین دكەن بەلێ زنجیرەیا پیشەسازیا پەلەوەران ل هەرێما كوردستانێ زنجیرەكا تەمام و پێشكەفتییە.
ڤێ زنجیرا بەرهەمهئینانا باش ل دەمێ ئەگەرێ گرتنا سنووران دا ژی تنێ ب ئینانا چەند كارتۆنێن كێم یێن هێكێن نەژادی مرۆڤ دشیاندایە تەمامیا زنجیرەیا بەرهەمهێنانا پەلەوەران ل هەرێمێ بگەڕینیت و بەردەوامیێ ب دابینكرنا گۆشت و بەرهەمێن پەلەوەران د ناڤخۆ دا بدەت.
