ئاوارە د ٤٥٥ قوتابخانەیێن دھۆکێ دانە و کەمپ ب لەز ناھێنە چێکرن
ئەڤرۆ، ئەمیر ئەترووشی:
سەرۆکێ رێکخراوا مافێن مرۆڤی ل کوردستانێ راگەھاند، نھا پتر ژ ٣٠ رێکخراوێن بیانی ل پارێزگەھا دھۆکێ کاردکەن بۆ ھاریکاریکرنا ئاوارەیان، بەلێ د سەر ھندێ را گەلەک خەمساری و روتین د کارێ وان دا ھەنە و گۆت: د سەر ھندێ را کو نھا ١٧ کەمپ ژی ژھێنە ئاڤاکرن، بەلێ ل گۆرەی دەمێ پێدڤی لەز د چێکرنا وان دا ناھێتە کرن و ئەڤە ژی کێماسیەک رێکخراوێن بیانی ل دھۆکێ دکەن، چونکو خواندن ل پارێزگەھا ھەولێر و سلێمانیێ ب نۆرمالی دھێتە کرن و ل دھۆکێ یا راگرتیە.
حەمدی بەرواری، سەرۆکێ رێکخراوا مافێن مرۆڤی ل کوردستانێ بۆ ئەڤرۆ دیار کر، ھەر ژ رۆژا ھاتنا ئاوارەیان بۆ پارێزگەھا دھۆکێ وان پەیوەندی ب رێکخراوێن نێڤدەولەتی کریە بۆ ھندێ ھاریکاریا پێشکێشی ئاوارەیان بکەن، وەکو ئەرک ژی مە پرۆژەک ل گەل رێکخراوا (NPA) یا نەرویجی ب ھەڤکاری ل گەل رێکخراوا فریاسازی مللی ل ھەولێرێ و پێنچ رێکخراوێن دی ئەنجام دا و گۆت: ئەڤ پرۆژە ب ھاریکاریا وێ رێکخراوا نەرویجی دھێتە ئەنجامدان و کوژمێ ملیونەک و ٥٠٠ ھزار دولاران بۆ خوارنا ئاوارەیان ھاتینە دابینکرن.
ناڤبری دیار کر کو ب رێیا ڤی پرۆژەی دێ ئازوقەی و خوارنێ گەھیننە ١٤٥٠٠ خێزانان و رێکخراوا مافی مرۆڤ ل دھۆکێ یا ئێکانەیە پشکدار تێدا و گۆت: چونکو ئەو ئاوارەیێن ل دھۆکێ ئاکنجی ژ ھەموو باژێرێن دی پترن، لەوما کوژمەکێ مەزن یێ پارا بۆ ئاوارەیێن دھۆکێ ھاتینە دابینکرن، ئەڤ ئازوقە ژی ژ کارتونەکا ٢٠ کیلو یا ئازوقەی و ٤٦ پارچا پێک دھێت و ھژمارەکا کەل و پەلان ژی ل گەل دایە وەکو سێتەکێ ئامانان یێن لێنانگەھێ و جلیکانێن ئاڤێ.
بەرواری ئاماژە ب وێ چەندێ کر کو زێدەباری ھاریکاریێن مرۆڤی، مە د وی بەرنامەی دا چەندین خۆلێن رۆشنبیری بۆ ئاوارەیان ھەنە و ھەر حەفتیێ دێ خۆل بۆ چەند ئاواران ھێنە ڤەکرن و ھندەک برگێن ھونەری ژی بۆ ئاواران ل گەل پرۆژەی ھەنە و گۆت ژی: مە پرۆژەکێ دی ژی بۆ ئاواران ل بەر ھەیە، ئەو ژی پرۆژێ پاراستنا ئافرەتێن بێ ھێز، بۆ نموونە ئەو ئافرەتێن ئاوارە یێن تووشی دەستدرێژیێ بووین یان ژی تووشی ھندەک ئاریشان بووین، دێ بزاڤێ کەین کا چو بۆ وان بھێتە کرن و ئەڤ پرۆژە دێ ژ ئالیێ ئێکەتیا ئەورۆپی ڤە ھێتە ھاوکاریکرن.
سەرۆکێ رێکخراوا مافێن مرۆڤی ل کوردستانێ ئەو یەک ژی نە ڤەشارت کو ژ بەر باردوخێ نھا یێ ھەرێمێ و ھاتنا ئاوارەیان ئەز ژ ئالیێ رێکخراوەکا نەرویجی ڤە ھاتیمە راسپاردن کو ببمە ئەمیندارێ گشتی یێ بنگەھێ ئەورۆپی و عەرەبی بۆ ھندێ چەندین چالاکیان ل دھۆکێ ئەنجام بدەین و ڤێ رێکخراوێ بنگەھەکێ ساخلەمیێ ھنارتیە زاخۆ کو ھاریکاریا ئاوارەیان بکەت.
حەمدی بەرواری ئاشکرا ژی کر، ھەتا نوکە حوکمەتا عیراقێ چو بۆ ئاوارەیان نەکریە و ب ئەرکێ خوە رانەبوویە، باشتر بوو ل شوونا ئەڤ رێکخراوێن بیانی ئەورۆپا و ئەمریکا ھاتبانە، ئەو ب ئەرکێ خوە رابانە و گۆت ژی: ب تایبەت نھا ئەم یێ بەر ب وەرزێ زڤستانێ دچین و ھەکە رەوشا ئاوارەیان ھەر ھوسا یا بەردەوام بیت، دێ ئاریشێن گەلەک مەزن و کارەسات ب سەر ئاوارەیان دا ھێن، لەوما باشتر گەلەک لەز د چێکرنا کەمپان دا بھێتە کرن.
بەرواری رەخنە ژی ل رێکخراوێن بیانی گرتن کو لەزێ د چێکرنا کەمپان دا ناکەن و قوتابیێن دھۆکێ ژی د ڤی بواری دا بووینە قوربانی، چونکو نھا وەرزێ خواندنێ ل ھەولێر و سلێمانیێ ب ئاسایی برێڤە دچیت و ل دھۆکێ ژی ل دووڤ ئامارێن رێڤەبەریا گشتیا پەروەردا دھۆکێ نھا ئاوارە ھێشتا د ٤٥٥ قوتابخانان دا د ئاکنجی نە و ئەڤە ژی دێ وەرزێ خواندنێ ھێشتا گیرۆتر لێ کەت.