مۆرالا بلند بۆ پاشه‌رۆژه‌كا گه‌ش
مه پێویستی ب وێ هێزێ هه‌یه ئه‌وا رۆژانه د پتریا ده‌مێن مه‌دا باوه‌ری و مۆراله‌كا بلند دده‌ته مه, نهو ژ هه‌موو ده‌مان پتر مه پێدڤی ب باوه‌ری بخوه‌بوونێ هه‌یه, ب باوه‌ریێ ژبۆ پاشه‌رۆژه‌كا گه‌شا تاك و جڤاكی, باوه‌ریا مرۆڤی ل ده‌مێن به‌رته‌نگ و ئاسته‌نگان دا دیار دبیت, هه‌ر ل ڤان ده‌ماندا مه پتر پێدڤی ب مۆرالا بلند هه‌یه. هه‌كه مه باوه‌ری ب پاشه‌رۆژێ هه‌بیت,دێ باوه‌ری ب ده‌ردورێن خوه ژی هه‌بیت, ژ خوه هه‌كه ئه‌م خوه شاش نه‌كه‌ین ب ئاسانی دێ وێ راستیێ زانین ئه‌وا نهو ئه‌م تێدا ده‌رباز دبین، ئه‌و ژی قه‌یرانا سیاسی و ئابووری یه, له‌و نهو ئه‌م پێدڤی ئه‌ندازه‌یا باوه‌ریێ نه, هه‌كه نه ل ده‌مێن ئاسایی دا پرسا باوه‌ریێ پرسه‌كا ئاسانه. ژبۆ به‌رهنگاربوونا كێشه‌یان, ئه‌م وه‌كو مرۆڤ پێش هه‌ر تشته‌كی مه پێدڤی ب هێزا ناڤخوه‌یا مرۆڤی هه‌یه, ئه‌و هێزا باوه‌ری و مۆرالا بلند ب مه دبه‌خشیت, باوه‌ریه‌كا راسته‌قینه نه‌ك سه‌خته و ده‌ستكرد. هێزه‌ك بیت ژێده‌رێ وێ باوه‌ری و مۆرال بیت, كو ژبیروباوه‌ریێن كوور ده‌ربچن, ئه‌ڤ هێزه ژی ژ ئایدۆلۆجیا و رێكخراوان ب رێ ناكه‌ڤن, ئه‌ڤ هێزه ب كه‌نالێن راگه‌هاندنێ دروست نابن, ڤێ هێزێ ب تنێ ئه‌م دشێین د ناخێ خوه دا بئافرینین, ئه‌و ژی ب گه‌هشتنا هزركرنێن ئه‌رێنی, هزركرنه‌ك بیت باوه‌ری و مۆرالا مه بلند بكه‌ت, رێیا پاشه‌رۆژه‌كا گه‌ش بۆ مه خوه‌ش بكه‌ت. باوه‌ری و مۆرالا بلند كاریگه‌رترین و پێدڤیترین بها د بارودۆخێ مه‌یێ نهو دا هه‌یه, باوه‌ریئینان ب ڤان هه‌ردو بهایان ئه‌ركێ مه هه‌موویانه, ب تنێ هه‌كه تاكه‌ك ژ مه نه‌بیت چو كه‌س نه‌شێت باوه‌ری و مۆرالێ د ناڤا مێشك و ده‌روونێ مه‌دا بچینیت, یا فه‌ره ئه‌م هه‌موو تاك ب چڤاكڤه باوه‌ریه‌كا موكم بۆ خوه چێكه‌ین بۆ پاشه‌رۆژا گه‌شا ڤی وه‌لاتی, چو حزب و ئایدۆلۆجیا و چو كه‌نالێن راگه‌هاندنێ نه‌شێن ڤی ئه‌ركی بگه‌هیننه مه. له‌و هزر و بیر هه‌ر دچاوا بن پێش هه‌موو هووراتیێن هزری و ئایدۆلۆجی, رۆلێ ئێكێ و دووماهیێ ژ هه‌بوون و نه‌بوونا باوه‌ریێ و باوه‌ریئینان ب پاشه‌رۆژێ بۆ هه‌ر تاكه‌كی ژ مه ڤه‌دگه‌ریت, ئه‌وا رێ ل گه‌شبینی و پاشه‌رۆژا گه‌ش دگریت ئه‌وه كو پتریا خه‌لكێ نهو ب چاڤێ گومانێ یان ب چاڤه‌كێ نزم و بی َئومێدی ته‌ماشه‌ی پاشه‌رۆژێ دكه‌ت, ئه‌ڤه ژی هه‌ناسه‌كا خرابكه‌ره نه‌مازه د قووناغه‌كا ناسك وه‌كو یا نهو, كو كێشه‌یێن سیاسی و دارایی كارتێكرن كریه ل سه‌ر بارێ ده‌روونی و ئارامیا هه‌ر تاكه‌كی. بلا ئه‌م ژ بهایێ ڤێ سه‌ربورا خوه یا گرنگ ژبۆ ژیانێ كێم نه‌كه‌ین, چونكی پاشان واته‌یا مانا مه دێ بۆ چو بیت؟ گه‌شبینی دینامۆیا سه‌رچاوه‌یێن هێزا گه‌ردۆنی یه, تاك و جڤاكێ مه ژی پشكه‌كه ژ جیهانێ, پێدڤیه بێ به‌هر نه‌بین ژ ڤێ هێزێ, ئه‌ڤ بێ به‌هركرنه ب ده‌ستێ مه‌یه, ئه‌م هه‌موو ل گه‌ل جڤاكێ بنه‌مایێ پاشه‌رۆژا خوه بدانین, گه‌شبینی و باوه‌ریا مه ب نهو و داهاتی پرسه‌كا مرۆڤی یه یا كووره, جه‌وهه‌ر و كاكلكا شارستانیه‌تا مه‌زنا دیرۆكێ ب مۆرالا بلند و باوه‌ری بخوه‌بوونێ دروست بوویه, له‌و نابیت هه‌موو رۆناهیێن باوه‌ری و گه‌شبینیێ ب بێ ئومێدی ل قه‌له‌م بده‌ین, ئه‌ڤ هزر و هه‌ناسه‌یا سار و نه‌رێنی هۆكارێ وێ هه‌ر چو بیت ل گه‌ل ناڤه‌رۆك جه‌وهه‌رێ ژیانێ دا ناگونجیت, ژبلی ڤێ ژی ئه‌ڤ جۆره هزره دژی یاسایێن بنه‌ره‌تیێن سروشت و گه‌ردۆنینه, كو ل سه‌ر بنه‌مایێن هێزێ به‌رده‌وام برێڤه دچیت. ئه‌م ژی چو وه‌كو تاك و چو وه‌كو جڤاك مه پێدڤی ب ڤێ هێزێ هه‌یه داكو بشێین ل گه‌ل گوهۆرینان برێڤه‌بچین و مفای ژێ وه‌رگرین.
