وەلاتەکێ دژی پشتەڤانیا خوە بۆ سەربەخۆیا کوردستانێ راگەھاند
ئەڤرۆ:
ھێمن ھەورامی بەرپرسێ پەیوەندیێن دەرڤە یێن پارتی دیموکراتی کوردستان ل گەل شاندەکێ بولگاری کۆمبوو و پێ راگەھاندن، روو ب رووبوونا کوردستانێ دژی تیرۆرستان و بریارێن حوکمەتا بەغدا، دڤێت دووماھیا وان سەرکەفتن بیت بۆ گەلێ کوردستانێ و پارتی ئەڤ چەندە یا کریە خالا بەراھیێ یا ستراتیژیەتا خوە، شاندێ بەلگاری ژی پشتەڤانیا خوە بۆ ڤێ ستراتیژیەتێ دیارکر و ب مافێ سەرەکیێ ھەر نەتەوەکی زانی.
شاندەکێ بلند یێ حزبا سۆسیال دیموکراتێن بولگاریا کو ژ سەرۆکێ وێ حزبێ و جێگرێ وی و شیرەتکارێ تایبەت یێ سەرۆک وەزیرێن بولگاریا بۆ کاروبارێن لەشکری و چەندین بسپۆرێن دی د وارێن وەبەرھێنانێ و بازرگانیێ دا ژلایێ ھێمن ھەورامی بەرپرسێ پەیوەندیێن دەرڤە یێن پارتی ڤە ھاتە پێشوازیکرن.
ھەورامی د وێ کۆمبوونێ دا گوت” نابیت ئێدی بریار ل سەر کوردستانیان بھێنە سەپاندن و پێدڤیە ئەو ب خوە خودان بریار بن و ئەڤ چەندە دڤێت د چارچۆڤێ کیانەکێ سەربخوەدا بیت”.
شاندێ وەلاتێ بولگاریا پشتەڤانیا خوە بۆ ڤێ ستراتیژیەتێ دیارکر و ب مافەکێ بنەرەتی یێ ھەر نەتەوەکی زانی و دیارکر کو نوکە بریار یا ل دەڤ نەتەوان و دێ ھاریکارێن ھەوە بین، دناڤ پێکھاتێ شاندێ وەلاتێ بولگاریا دا، پیتەپێدانا رژد یا سۆسیال دیموکراتێن بولگاریا نیشادان بۆ پشتەڤانیا باشوورێ کوردستانێ.
