دهۆك سه‌ركه‌فتن ل سه‌ر سلێمانیێ تۆمار كر
ئه‌ڤرۆ نيوز،هه‌ژار مه‌عروف:
تیما ته‌پا پێ یا دهۆك سه‌ركه‌فتنا خوه یا دوێ ل دوڤ ئێك توماركر پشتی دوهی شیای ب سه‌ركه‌فیت ل سه‌ر یانا سلێمانیێ ل یاریگه‌ها وێ ب گوله‌كێ بێ به‌رامبه‌ر ژ چارچوڤێ یاریێن گه‌را سێ ژ خولا پلا نایاب یا عیراقێ.
دڤێ یاریێ دا تیما ته‌پا پێ یا دهۆك ل نیڤا ئێكێ دا نه ل ئاستێ پێدڤی بوو تایبه‌ت ل هێلا ناڤین كو تیما سلێمانیێ شیابوو كونترول سه‌ر یاریگه‌هێ بكه‌ت و گه‌له‌ك هه‌لكه‌فتا دا تیما سلێمانیێ خوه نێزیكی گولا دهۆكێ كر، ل نیڤا دوێ تیما دهۆك باشتر هاته دناڤ یاریێ دا تایبه‌ت پشتی راهێنه‌رێ تیمێ چه‌ند گوهورین د پێكهاتیێ تیمێ دا كرین و ئه‌و بوو ل دقیقا 63 یاریكه‌رێ پیشه‌كارێ كامیرونی ئه‌نیست ئینگا گولا ئێكێ و سه‌ركه‌فتنێ بوو تیما دهۆك توماركر و پشتی ڤێ گولێ تیما دهۆك گڤاشتنێن مه‌زنتر ل سه‌ر گولا سلێمانیێ كرن لێ د بێ مفابوون و ل ده‌ه دقیقه‌یێن دووماهیێ ژ یاریێ تیما سلێمانیێ كونترول ب تمامی ل سه‌ر یاریێ كر و چه‌ندین هێرشێن مه‌ترسی كرنه سه‌ر گولا دهۆك و ل دقیقا 87 گولچیێ تیما دهۆك عوده‌ی تالب تیما خوه ژ گوله‌كا مسوگه‌ر قورتالكر ده‌مێ ته‌پا یاریكه‌رێ یانا سلێمانیێ هه‌رێم بورهان ڤه‌گه‌راندی و ب ڤێ سه‌ركه‌فتنێ تیما دهۆك خالێن خوه گه‌هاندنه شه‌ش خالان ژ دو یاریان.
ل دۆر ڤێ یاریێ راهێنه‌رێ یانا دهۆك باسم قاسم گوت: سه‌راری ڤێ سه‌ركه‌فتنێ ئه‌ز ژ ئاستێ هونه‌ری یێ تیمێ نه یێ رازی مه ژبه‌ركو ئه‌وا مه دڤیا هه‌تانوكه ل ده‌ڤ یاریكه‌ران نه‌هاتیه كرن لێ یا گرنگ ئه‌وه مه سێ خالێن یاریێ ژ ده‌رڤه‌ی یاریگه‌ها خوه ب ده‌ستخوڤه ئینان و ب ئومێدم یاریێ بوو یاریێ ئاستێ تیمێ دێ پێشكه‌ڤیت هه‌ر چه‌نده گه‌له‌ك كێماسی ل تیمێ هه‌نه كو هه‌تانوكه چو یاریكه‌ران پشكا خوه یا ئێكێ ژ هه‌ڤبه‌ستێ نه وه‌رگرتی یه.
