ناتۆ دێ ئه‌ڤرۆ دانوستاندنێ ل سه‌ر هاتنا له‌شكرى بۆ عيراقێ كه‌ت
ئەڤرۆ نیوز،زنار تۆڤی:
نوونەرێ حوکمەتا ھەرێما کوردستانێ ل پەرلەمانێ ئوروپا، دلاوەر ئاژگەیی، بۆ ئەڤرۆ نیوز گۆت: “ئەڤرۆ رۆژا پێنجشەمبی رێكه‌فتى 25ى خزيرانا 2015ێ وەزیرێن به‌ره‌ڤانيێ یێن 28 وەلاتێن ئەندام د پەیمانا (ناتۆ) دا ل برۆکسلا پایتەختێ بەلجیکا دێ کۆم بن دا دانوستاندنێ ل سه‌ر پلانا ستراتیجی و داھاتیێ ناتۆ بكه‌ن”.
زێده‌تر گۆت: “ئێک ژ مژارێن سەرەکی یێن وێ کومبوونێ بریاردانە ل سەر داخوازیا عيراقێ کو جارەکادی ھێزێن ناتۆیێ ڤەگەرنە عيراقێ و ھاریکاریا عيراقێ بکەن د شەرێ دژی داعشدا”.
ئاماژه ب وێ چه‌ندێ ژى كر كو ل دەمێ ڤەگەریانا ناتۆ بۆ عيراق و پێشکێشکرنا ھاریکاریان بارودۆخێ نوو یێ عيراقێ بەرچاڤ دێ ھێتە وەرگرتن و گۆت: “ھاریکاری دێ بۆ ھەمی بەشێن عيراقێ بن و رەنگە ھەرێما کوردستانێ دڤی دەمی دا فشارێ بێخیتە سەر ناتۆ بۆ بەشداریکرنا ھەرێما کوردستانێ د وان ھاریکاریێن داھاتی دا پێشکیشی عيراقێ دکەن”.