عه‌لی عه‌دنان ئه‌ڤرۆ هه‌ڤبه‌ستا یانا ئودینیزی یا ئیتالی موركر
ئه‌ڤرۆنیۆز، ئه‌یاد به‌روارى
یانا ئودینیزی یا ئیتالی ئه‌ڤرۆ ئه‌ینیێ د مالپه‌رێ خوه یێ فه‌رمی ل سه‌ر تۆرا ئه‌نترنێتێ ده‌نگوباسێ موركرنا هه‌ڤبه‌ستا یاریكه‌رێ هه‌لبژارتیێ عیراقێ یێ ته‌پا پێی عه‌لی عه‌دنان بۆ وێ یانێ راگه‌هاند.
یانا ئودینیزی یا ئیتالی بهایێ هه‌ڤبه‌ستا عه‌لی عه‌دنان ئاشكرانه‌كر ودیاركر كو دێ هه‌لگرێ فانێلا هژمار 53 بیت.
عه‌لی عه‌دنان یاریكه‌رێ هێلا به‌ره‌ڤانیا هه‌لبژارتیێ عیراقێ یه، دهێته هژمارتن ئێكه‌مین یاریكه‌رێ عیراقی كو ل خۆلا پلا ئێك یا ئیتالی یاریێ بكه‌ت، به‌ری نوكه بۆ یانا (به‌غداد) یا عیراقی یاری دكر و ل سالا 2012 هاته ڤه‌گوهاستن بۆ یانا (ریزا سپۆر) یا توركی.
یانا ئودینیزی یا ئیتالی ئه‌وا ل وه‌رزێ بۆری یا خۆلا ئیتالیا 2014-2015 ل پلا 17 هاتی، دهێته هژمارتن دووه‌مین كه‌ڤنترین یانا ته‌پا پیێ یا ئیتالی پشتى یانا ( جه‌نوا) و ل سالا 1896 یا هاتیه دامه‌زراندن و یانا باژێرێ (ئودینی) یا ل باكوورێ ئیتالیا، هه‌تا نوكه چو جاران ناسناڤێ خۆلا ئیتالیا ب ده‌ستڤه‌نه‌ئینایه و باشترین ئه‌نجامێن وێ یانێ ل وه‌رزێ 1954-1955 بوو ده‌مێ ل رێزا دویێ هاتی پشتى یانا میلان و چه‌ندین جاران ژى رێزا سیێ و چارێ بده‌ستڤه‌ئینایه و چه‌ندین جاران ژى پشكداری د خۆلا قاره‌مانێن خۆلێن ئورۆپی دا یا كری.
